स्वागतम समाचारदाता
जनकपुरधाम, मंसिर २९ ।
प्रदेश २ को जनकपुरधाममा प्रदेश जनस्वास्थ्य प्रयोगशाला र प्रदेश मेडिकल स्टोर बन्ने भएको छ । जनकपुरधाममा बुधवार प्रदेश जनस्वास्थ्य प्रयोगशालाको भवन एवं प्रदेश मेडिकल स्टोर भवनको शिलान्यास गरिएको छ । नेपाल सरकारका सहरी विकासमन्त्री रामकुमारी झाँक्रीले शिलान्यास गर्दै जनस्वास्थ्य प्रयोगशालाको भवन एवं प्रदेश मेडिकल स्टोर भवनको निर्माणपछि प्रदेशको स्वास्थ्य क्षेत्रमा उल्लेख प्रगति हुने विश्वास व्यक्त गरेका छन् ।
सो कार्यक्रममा प्रदेश २ का मुख्यमन्त्री लालबाबु राउतले शिलान्यास गरिएका भवन तीनै तहबीचको समन्वय र सहकार्यको अनुपम उदाहरण भएको बताएका छन् । जनकपुरधाम उपमहानगरपालिका–१४ मुजेलियास्थित ग्रामीण प्रशिक्षण केन्द्रको कम्पाउण्डभित्र निर्माण हुन लागेको उक्त भवनको सहरी विकासमन्त्री रामकुमारी झाँक्री, प्रदेश २ का मुख्यमन्त्री लालबाबु राउत र समाजिक विकासमन्त्री नवलकिशोर साहले संयुक्त रूपमा शिलान्यास गरेका छन् ।
जम्मा रु.७ करोड २७ लाखको लागतमा निर्माण हुने सो प्रदेश जनस्वास्थ्य प्रयोगशाला साढे तीन तल्ले हुनेछ । सो भवन २०८० साल वैशाख ९ गतेभित्र सम्पन्न गर्ने लक्ष्य लिइएको छ । यस्तै रु. ४ करोड ४२ लाखमा निर्माण हुने प्रदेश मेडिकल स्टोरसमेत डेढ वर्षभित्र निर्माण सम्पन्न गर्ने लक्ष्य लिइएको सहरी विकास मन्त्रालयका सचिव मणिराम गेलालले जानकारी दिएका छन् । यता प्रदेश २ के जनकपुरधाममा कोभिड–१९ विरुद्धको खोप भण्डारण गृहको समेत बुधवार उद्घाटन गरिएको थियो ।
