विनोद महतो
धनुषा, पौष ३ ।
धनुषाको मिथिला नगरपालिका वडा नं.२ नक्टाझिजस्थित हिमालय युवा क्लवको वार्षिक साधारणसभा समारोह शनिवार भव्य रुपमा मनाएको छ । क्लवका अध्यक्ष अरुण कुमार महतोको अध्यक्षता तथा प्रदेश २ का प्रदेशसभा सदस्य एवं उद्योग, पर्यटन तथा वनमन्त्री शत्रुधन महतोको प्रमुख आतिथ्यमा साधारणसभा मनाएको हो ।
सो अवसरमा क्लवको वार्षिक आयव्यय विवरण, वार्षिक प्रगति विवरण, रक्तदान, सम्मान तथा पुरस्कार वितरण र सांस्कृति कार्यक्रम गरिएको थियो । साधारणसभाको अवसरमा क्लवका उपाध्यक्ष विनोद कुमार महतोले स्वागत मन्तव्य राखेको थियो, भने कोषाध्यक्ष कविता कुमारी सिन्हाले क्लवको वार्षिक आयव्यय विवरण प्रस्तुत गरेकी थिइन् ।
यस्तै क्लवको साधारणसभाको अवसरमा क्लवका सचिव शिवकुमार सिंहले वार्षिक प्रगति तथा अगामी योजनाहरु प्रस्तुत गरेका थिए ।
साधारणसभाको अवसरमा विशिष्ट अतिथिको रुपमा मिथिला नगरपालिकाका नगर प्रमुख हरिनारायण महतो, वडा नं. २ का वडा अध्यक्ष विहारी महतो, क्लवको कानुनी सल्लाहकार तथा अधिवक्ता कालेश्वर महतो, सल्लाहकार भगलु महतो, वनअधिकृत सुरेश शर्मा, जनता मा.वि. नक्टाझिजमा प्रधानाध्यापक श्याम कुमार यादव, क्षीरेश्वरनाथ नगरपालिका वडा नं. ७ का वडाअध्यक्ष रामकिशुन यादव लगायत विभिन्न क्षेत्रका वक्ताहरुले आ–आफ्नो शुभकामना मन्तव्य राखेका थिए ।
साधारणसभा कार्यक्रमको उद्घोषण क्लवका सचिव शिवकुमार सिंहले गरेका थिए । यता साधारणसभा अन्तर्गत भएको रक्तदान कार्यक्रममा महिला सहित जम्मा ३१ जनाले रक्तदान गरेका छन् ।
त्यस्तै साधारणसभाको अवसरमा सप्ताहव्यापी कार्यक्रम पनि गरिएको थियो । सो अवसरमा क्लवद्धारा सम्पन्न विभिन्न प्रतियोगिताका विजेताहरुलाई पुरस्कार वितरण गरिएको छ । विभिन्न प्रतियोगिताहरुमा सहभागी संघसंस्था, बाल क्लव, विद्यालय र युवा क्लवका प्रतियोगी तथा विजेताहरुलाई प्रमाण पत्र, पुरस्कार तथा शिल्ड र स्टेशनरी सामग्री वितरण गरिएको छ । यस्तै रक्तदान कार्यक्रममा रेडक्रसको तर्फबाट योगदान पुग्याए वापत नारायण प्रसाद न्यौपानेलाई पनि सम्मान गरिएको क्लवले जनाएको छ ।
नक्टाझिज विश्वकर्माचौस्थित क्लवको प्राङ्गणमा भएको उक्त सबै कार्यक्रमहरु हेर्न हजारौंको संख्यामा स्थानीयबासी तथा अतिथिगणहरुको उपस्थिति रहेको थियो ।
समाजिक, सांस्कृति, खेलकुद, शिक्षा, स्वास्थ्य, सरसफाइ लगायतको क्षेत्रमा क्लवले अग्रणी भूमिका खेल्दै आएको छ । ग्रामीण क्षेत्रकै सबैभन्दा चर्चित र सक्रिय युवा क्लवको रुपमा हिमालय युवा क्लवलाई चिनिँदै आएको छ ।
