स्वागतम समाचारदाता
सर्लाही, पौष १३ ।
सर्लाही जिल्लाको बयलवासमा प्रहरी भ्यानको ठक्ककरले एकजना व्यापारीको ज्यान गएको विरोधमा प्रदर्शनले उग्र रुप लिएको छ । स्थानीयबासी तथा व्यापारीहरुले व्यापारीलाई ठक्कर दिएर मार्ने गाडीका चालक, प्रहरीलाई कारवाही गर्न माग गर्दै प्रर्दशन उग्र पारेका छन् । प्रर्दशन उग्र पारेपछि जिल्ला प्रशासन कार्यालय सर्लाहीले ईश्वरपुर क्षेत्रमा निषेधाज्ञा (कफ्र्यू) लगाइएको छ ।
निषेधाज्ञा लगाएपनि प्रदर्शनकारी र सुरक्षाकर्मी बीच पटक पटक झडप भएको छ । प्रदर्शन थप चर्किन नदिन ठूलो संख्यामा सुरक्षाकर्मी परिचालन गरिएको छ, भने सो क्षेत्रमा एरिया तोकेर निषेधाज्ञा लगाइएको छ ।
सर्लाहीका प्रमुख जिल्ला अधिकारीले ईलाका प्रहरी कार्यालय केशरगंज सर्लाहीबाट ईश्वरपुर–४, सागरनाथ टोलसम्म र पश्चिममा ईश्वरपुर–८ रामपुर टोलसम्म, उत्तरमा ईश्वरपुर–५ सखुवनी टोलसम्म र दक्षिणमा ईश्वरपुर–९ खोरिया टोलसम्म निषेधाज्ञा जारी गरेका छन् ।
यस अघि प्रहरीले स्थिति नियन्त्रणमा लिन दर्जनौँ सेल अश्रुग्याँस प्रहार गरेको थियो । सोमबार दिउँसो ३ घण्टा भन्दा बढी पीडितसँग भएको वार्तामा कुनै सहमति नभएकाले मंगलबार पुनः वार्ता भई रहेको छ ।
यता प्रदेश प्रहरी कार्यालय जनकपुरबाट वरिष्ठ प्रहरी उपरीक्षक (एसएसपी) मसाउद आलम खाँको कमाण्डमा ठूलो संख्यामा बयलबास क्षेत्रमा सुरक्षाकर्मी खटाइएको छ । त्यसैगरी सशस्त्र प्रहरीको टोली समेत खटाइएको हो ।
प्रहरी भ्यानको ठक्करबाट एक जना व्यापारीको मृत्यु भएपछि सोमबार र मंगलबार दिनभर ईश्वरपुर नगरपालिकास्थित बयलवास बजारमा प्रदर्शन भएको हो ।
आक्रोशित स्थानीयहरुले ईलाका प्रहरी कार्यालय हरिपुरको जिपमा आगजनी गर्नुका साथै बयलवासस्थित ईलाका प्रहरी कार्यालय केशरगन्जमा ढुंगामुढा समेत गरेका थिए ।
यसैबीच पीडित परिवारसँग कुरा गर्न पुगेका ईश्वरपुर नगरपालिकाका मेयर मनोज कुमार देवकोटाले चढने ना १ झ १५७० गाडीलाई समेत तोडफोड गरिएको छ भने मेयर देवकोटा माथी हातपात भएको हो । मेयर देवकोटाको घाटिमा चोट लागेको र उनको महोत्तरीको बर्दिवासस्थित एक अस्पतालमा उपचार भईरहेको बताइएको छ ।
