स्वागतम समाचारदाता
महेन्द्रनगर, माघ २३ ।
रासायनिक मलको अभावका कारण अचेल व्यवसायिक तरकारी खेती घट्दै गईरहेको छ । खेतीपातीका लागि मलको अभाव झेल्दै आएका किसानहरुले भने तरकारी खेतीका लागि समेत मलको अभाव भएका बताएका छन् । मल अभावका कारण व्यवसायिक रुपमा तरकारी खेती गर्दै आएका किसानहरुले भने लगानी र मेहनत अनुसार उब्जनी नभएपनि खेती घटाउँदै लगेको छन् ।
एक त समयमा मल पाउँदैन, पाएपनि ब्लेकबाट मंहगोमा किन्नुपर्ने हुन्छ, लागत पनि नउठ्ने भएपनि तरकारी खेती घटाउँदै गएको धनुषाको क्षीरेश्वरनाथ नगरपालिका ८ दिगम्वरपुरका किसान रामउदगार महतो बताउँछन् । एक देखि डेढ विग्हा क्षेत्रफलमा वर्षेनी तरकारी खेती गर्दै आएका किसान महतो अहिले मल अभावकै कारण १० कठ्ठामा मात्र तरकारी खेती गर्न थालेको बताएका छन् ।
अहिले १० कठ्ठामा मात्र व्यवसायिक रुपमा काउली, बैगन, खुर्सानी, ओल, भिण्डी लगायतको तरकारी गरेपनि आवश्यकता अनुसार मल हाल्न नपाएकोले फसल र उब्जनी राम्रो हुन नसक्दा मेहनत र लगानी उठाउन समेत मुश्किल भएको उनले बताए ।
विगतका वर्षहरुमा ५ कठ्ठा खेतमा व्यवसायिक रुपमै तरकारी खेती गर्दै आएका धनुषाका मिथिला नगरपालिका २ नक्टाझिजका सुरत लाल महतोले मल नपाएर अहिले खेती छोड्नु परेको बताउँछन् । उनले भने ‘विना मल खाद्यको केही पनि हुँदैन, खेती गरेपछि समयमा बालीमा मल हाल्नै पर्छ तर मल समयमा पाउँदैन, पाएपनि ब्लेकमा महंगोमा किन्नुपर्छ ।’ विना मल खाद्य र किटनाशक औषधीको अभावले बाली नै सप्रिदैँन, फसल राम्रो आउँदै, फल लाग्दैन्, खेतीको लागत अनुसार तरकारीको भाउ हुँदैन् अनि कसरी गर्ने खेती भन्दै उनले सरकारले किसानको समस्या नसुनेको गुनासो गरे । मल अभावकै कारण अहिले आफ्नो घरपरिवारलाई खान पुग्ने जति मात्रै तरकारी खेती गरेको उनले बताए ।
मल अभावकै कारण हाल आएर टनेल बनाएर आर्गनिक खेतीतर्फ आकर्षित भएका नक्टाझिजकै रामचन्द्र महतो सीप र प्रविधिको अभावमा सफल हुन नसकेको बताउँछन् । आर्गनिक खेती महंगो पर्न जान्छ, टनेल पनि बनाउनु पर्छ, मिथिला नगरपालिकाले टनेल बनाउन केही समान सहयोग गरेपनि खेती गर्ने तौरतरिका र प्रविधीको ज्ञान सीपमा दक्षता अभावका कारण सफल हुन नसकेको उनले बताए ।
तरकारी खेतीपातीका लागि जमिन र बालीको लागि आवश्यक पर्ने रासायनिक मल डि.ए.पी (मटिया खाद्य), युरिया मलको अभाव विगत केही वर्षदेखि किसानहरु झेल्दै आएका छन् भने महंगोमा मल किनेर खेतीपाती गर्न बाध्य छन् ।
सरकारले मलको समस्या चाँडै समाधान नगरेमा तरकारी खेती छोड्नु पर्ने अवस्था आएको किसानहरु बताउँछन् । व्यवसायिक तरकारी खेती गर्ने किसानहरु मल खाद्यकै अभावका कारण खेतीमा कटौती गरेको छ भने कतिपय किसान अन्य पेशामा पलायन हुने अवस्था आउन थालेको छ ।
