राजेश महतो
महेन्द्रनगर, फाल्गुन १६ ।
यस वर्ष फागुन १७ गते मंगलबार ८६ औं महाशिवरात्री पर्व मनाईदै छ । महाशिवरात्रीको तयारी शिवालयहरुमा जोडतोडका साथ भईरहेको छ । यता महाशिवरात्रीकै पूर्व सन्ध्याँमा धनुषाका क्षीरेश्वरनाथ नगरपालिका वडा नं. ७ महेन्द्रनगर महादेव मठस्थित प्राचीन क्षीरेश्वरनाथ महादेव मन्दिर परिसरमा बृहत सरसफाइ गरिएको छ ।
श्री क्षीरेश्वरनाथ धर्म संस्थाको आयोजनामा गरिएको सरसफाइ कार्यक्रममा नेपाली सेना, नेपाल प्रहरी, शसस्त्र प्रहरी, स्थानियबासी, विद्यालयका विद्यार्थी र मन्दिर ब्यवस्थापन समितिका सदस्य लगायत सयौं भन्दा बढकिो सहभागीता रहेको थियो । सरसफाइ कार्यक्रम अन्तर्गत मन्दिर परिसर र मन्दिर बाहिरको बाटोघाटो सरसफाइ गरिएको छ ।
सो अवसरमा मन्दिर ब्यवस्थापन समितिका अध्यक्ष ईश्वरी अधिकारीले महाशिवरात्री पर्वमा मन्दिर परिसरमा सरसफाइ अभियान चलाएर सहयोग गर्ने सबैलाई धन्यवाद दिनुभयो । उहाँले आफुहरुले महाशिवरात्रीमा भक्तजनहरुलाई सहजताका लागि पुजापाठ गर्न समिति समेत गठन गरेको बताउनुभयो ।
उहाँले मन्दिरको व्यवस्थापन र व्यवस्थित गर्ने कार्यमा स्थानिय, प्रदेश र संघ सरकारले पनि सहयोग गर्नुपर्ने बताउनुभयो । तर सरकारको पक्षबाट सहयोग नभेट्दा व्यवस्थापन समिति र स्थानिय बुद्धिजिवीहरुको सहयोगमा मन्दिर संचालन, व्यवस्थापन गर्दै आईरहेको जानकारी दिनुभयो ।
यता महाशिवरात्रीको अवसरमा सोमबार हनुमान आराधना, मंगलबार मन्दिरमा विहान ७ बजे देखि अष्ठजाम, ८ बजे देखि रुद्धी पाठ र फाल्गुन १६ गते देखि फाल्गुन १८ गते १२ बजे सम्म साधु भोजनको व्यवस्था गरिएको छ । यस्तै १८ गतेको १ बजेदेखि साधु विदाइ कार्यक्रम राखिएको व्यवस्थापन समितिका अध्यक्ष अधिकारीले जानकारी दिनुभयो ।
सरसफाइ कार्यक्रममा क्षीरेश्वरनाथ उद्योग वाणिज्य संघका अध्यक्ष सुरेश प्रसाद यादव, उपाध्यक्ष विनय साह, महासचिव दिपक साह, सदस्य राज किशोर राउत, पूर्व अध्यक्ष रामजी सिंह, ईलाका प्रहरी कार्यालय महेन्द्रनगरका प्रहरी निरिक्षक बेचन यादवका टिम, दर्शनिया रामेश्वर सिंह कुशवाहा एकेडमी स्कुल र गंगोत्री बोडिङ्ग स्कुलका विद्यार्थी, स्थानियबासी लगायतको सयोंको उपस्थिति रहेको थियो । सरसफाइ कार्यक्रममा क्षीरेश्वरनाथ नगरपालिकाको फोहर उठाउने गाडी र मेस्तरले सहयोग गरेको थियो ।
