स्वागतम खबर
रौतहट, फागनु २५ ।
मधेश प्रदेशमा समान्य काम कुरोमा पनि सार्वजनिक विदा दिने प्रवृति बढ्दै गएको छ । जसको बेला बेलामा जनस्तरबाट विरोध र टिकाटिप्पणी समेत हुने गरेको छ । अब यतिसम्म भयो कि नगरस्तरीय खेलकुद प्रतियोगिताका लागि स्थानीय तहले पनि सार्वजनिक विदा नै दिन थाल्यो । संघीय शासन प्रणालीमा मुलक गएको देशले तीन तहको सरकार पाएको छ र देशका तीनै तहको सरकारको आ- आफ्नै हक अधिकार, ऐन कानुन, विधेयक, नियम, निर्देशिका छ ।
तीनै तहको सरकारले आफ्नो रितिसंस्कृति अनुसारको चाडवाड र अन्य विशेष कार्यमा सार्वजनिक विदा दिने चलन बनाएको छ । तर विदाको नाममा समान्य गतिविधिमा पनि सार्वजनिक विदा दिने क्रम बढेपछि जनस्तरबाट विरोध समेत हुने गरेको देखिन्छ । पटक- पटक विदा दिने नाउँमा जनस्तरबाट आलोचना खेपिरहेका मधेश प्रदेश सरकारकै बाटो स्थानीय सरकारले पनि पन्छ्याउँन थालेको देखिन्छ ।
यस्तै सार्वजनिक विदा दिनेमा पछिल्लो पटक मधेश प्रदेशको ईशनाथ नगरपालिका औरैया रौतहट परेको छ । ईशनाथ नगरपालिका रौटहटले अन्तर पालिकास्तरीय मेयर कप टि-ट्वान्टी क्रिकेट प्रतियोगिताका २०७८ को अन्तिम खेलमा लागि नगरमा दुई दिने सार्वजनिक विदा दिएको छ । नगरपालिकाका नगर प्रमुख संतोष कुमार मेहता र उप प्रमुख हुस्ने आराद्धारा हस्ताक्षरित पत्रमा आज फागुन २५ र भोली २६ गते दुई दिने सार्वजनिक विदा दिएको उल्लेख छ ।
ईशनाथ नगरपालिका औरैयाले अन्तर पालिकास्तरीय मेयर कप टि-ट्वान्टी क्रिकेट प्रतियोगिताका २०७८ को अन्तिम खेलका कारण नगरपालिकाको कर्मचारीहरु समेत खेल व्यवस्थापनमा कार्यमा लाग्नुपर्ने भएकोले पालिकाभरि दुई दिने सार्वजनिक विदा दिएको पत्रमा उल्लेख छ ।
दुई दिने सार्वजनिक विदाका कारण नगरपालिका भरि रहेको कुनै पनि सरकारी कार्यालय, विद्यालय, कलेज, अन्य संघसंस्था समेत बन्द रहने छ । जसको कारण विद्यालय बन्द हुँदा विद्यार्थीको पढाई प्रभावित हुने देखिन्छ । क्रिकेट खेलकै कारण विद्यार्थीको पढाई प्रभावित हुने गरी दुई दिनसम्म सार्वजनिक विदा दिनु गैरजिम्मेवारपूर्ण कार्य रहेको भन्दै कतिपय ठाउँमा टिकाटिप्पणी समेत भईरहेको छ । अधिकार प्रयोगकै नाउँमा यस्ता कार्यले अन्य समान्य कार्यमा समेत विदा दिने परम्परा नै बस्न सक्ने कतिपयको तर्क छ ।
