स्वागतम खबर
काठमाडौं, चैत २ ।
पेश भएको विभिन्न ४२ वटा विधेयक माथि छलफल नगर्दै संघीय संसदको दुवै सदनका चालु हिउँदे अधिवेशन अन्त्य भएको छ । संसदको विधेयक अधिवेशन कुनै विधेयक पारित नगरी सकिएको हो । यस अधिवेशनमा अमेरिकी सहयोग एमसीसी परियोजना मात्रै पारित गरेको छ ।
नेपाल सरकार मन्त्रिपरिषद्को सिफारिसमा राष्ट्रपति विद्यादेवी भण्डारीले प्रतिनिधिसभा र राष्ट्रियसभा दुवैको हिउँदे अधिवेशन मंगलबार राति १२ बजेदेखि अन्त्य गर्नुभएको संघीय संसद् सचिवालयले जनाएको छ ।
प्रतिनिधि सभाको दशौँ अधिवेशन अवधिभर प्रमुख प्रतिपक्षी नेकपा एमालेको अवरोधका कारण प्रायः अवरुद्ध नै रहेको थियो । एमाले अवरोधका बीच सञ्चालन भएको बैठकबाट अमेरिकी सहयोग एमसीसी परियोजना मात्रै पारित गर्न सकेको छ ।
संसदको विधेयक अधिवेशन एउटै विधेयक पारित नभई सकिएको हो । यस अधिवेशनमा कुनै पनि नयाँ विधेयक दर्ता नभएको संसद् सचिवालयले जनाएको छ । प्रतिनिधि सभामा अघिल्ला अधिवेशनबाट विभिन्न चरणमा रहेका ४२ विधेयक प्राप्त भएका थिए ।
अधिवेशन अन्त्यसँगै नागरिकता लगायतका महत्वपूर्ण विधेयक अलपत्र परेका छन् । यस्तै राष्ट्रिय सभामा पनि १५ वटा विधेयक विचाराधीन अवस्थामा रहेका छन् ।
एमालेको अवरोधकैबीच दशौँ अधिवेशनबाट ‘यौन हिंसाविरुद्धका केही ऐनलाई संशोधन गर्ने अध्यादेश, २०७८, तेजाब तथा अन्य घातक रासायनिक पदार्थ नियमन अध्यादेश २०७८, सामाजिक सुरक्षा (पहिलो संशोधन) अध्यादेश, २०७८ लगायतका केही अध्यादेश स्वीकृत भए । चालु अधिवेशन अन्त्यसँगै प्रधान न्यायाधीश चोलेन्द्र शमसेर जबरा विरुद्धको महाअभियोग माथिको छलफल पनि अनिश्चित बनेको छ ।
सचिवालयले निकालेको सूचनामा बुधवारका लागि तोकिएको प्रतिनिधि सभा बैठक र माघ १६ गतेदेखि अर्को सूचना नभएसम्मका लागि स्थगित राष्ट्रियसभा बैठक समेत अन्त्य भएको कुरा उल्लेख छ । मङ्सिर २८ गते शुरु भएको अधिवेशनमा जम्मा ७ घण्टा ५० मिनेट संसदीय काम कारबाही भएको संसद् सचिवालयले जनाएको छ ।
यता जबरा माथिको महाअभियोग प्रस्तावमाथि बुधवारदेखि छलफल शुरु गर्ने गरि मिति तोकिएको थियो । संसद अधिवेशन सकिएसँगै निलम्बनमा परिसक्नुभएका प्रधान न्यायशीध चोलेन्द्र समशेर जबरा विरुद्धको महाअभियोग टुङ्गो लाग्ने सम्भावना पनि कम भएको देखिएको छ ।
