स्वागतम खबर
महेन्द्रनगर, चैत १७ ।
नेपालमा सामाजिक सद्भावका लागि नागरिकहरुको सहभागिता विषयमा परिचात्मक कार्याशाला गोष्ठी विहिवार धनुषाको क्षीरेश्वरनाथ नगरपालिका महेन्द्रनगरमा सम्पन्न भएको छ । गोष्ठीमा समाजमा अझैसम्म पनि हट्न नसकेको भेदभाव, छुवाछुत, सामाजिक अवहेलना, बोक्सी आरोप, एकल महिलाले खेप्नु पर्ने दवाव, लाञ्छना लगायतको विषयमा वक्ताहरुले आफ्नो विचार राखेका छन् ।
कार्यक्रममा एकल महिला समूहकी मधेश प्रदेश अध्यक्ष अनिता देवकोटाले समाजमा अझै पनि एकल महिलालाई हेर्ने दृष्टकोणमा परिवर्तन आउन नसकेको अनुभव सुनाईन् । समाजमा एकल महिलालाई हेर्ने दृष्टिकोण, लगाउने विभिन्न लाञ्छना र सोचाइमा परिर्वतन नभएसम्म एउटा समृद्ध र सभ्य समाजको परिकल्पना साकार हुन नसक्ने उनी बताईन् ।
जवानी उमेरमै श्रीमान गुमाएपछि समाजमा एकल महिला भएर बाँच्न निकै कठिन रहेको र जिवन नै पट्यारलाग्दो हुँदो रहेछ, उनले भनिन् ‘तर जिवनमा हरेस खानु हुँदैन्, आवेशमा केही दुर्घटना निम्त्याउनु हुँदैन, एकल महिलाले समाजमा जिवनको संघर्षका कठिन यात्रालाई चिर्दै अगाडी बढ्नुपर्छ, ताकी भोलीका दिनमा पनि यस्ता महिलालाई हौसला मिलोस् ।’ युग परिर्वतन भयो तर युगको माग अनुसार समाज अझै परिवर्तन हुन आवश्यक रहेकोले सामाजिक सद्भावका लागि राज्यका हरेक तह र तप्काका नागरिकहरु मिलेर अघि बढ्नुपर्ने उनले बताईन् ।
यस्तै कार्यक्रममा ईन्सेकका मधेश प्रदेश संयोजक राजु पासवानले समाजिक विकृति र विसंगतिहरुलाई चिर्न समाज अझै पनि परिवर्तन र रुपान्तरण हुन जरुरी रहेको बताउनुभयो । उनले भने, ‘समाज रुपन्तरणका लागि समाजमा पुर्खौदेखि जाडा गाँसेर बसेको जातिय छुवाछुत, बोक्सी आरोप, समाजिक अवहेलना, हेपहा प्रवृतिको जरैदेखि अन्त्य हुनुपर्ने हो तर अझैसम्म पनि यस्ता अपराध भईरहेको छ ।’ समाजका यस्ता कुरीति र विसंगतिलाई चिर्न र सामाजिक सद्भाव कायम गर्न सबै पक्षको सहयोग र सहकार्य हुनुपर्नेमा जोड दिनुभयो ।
गोष्ठीमा क्षीरेश्वरनाथ नगरपालिकाकी उपमेयर रचना माथेमा, प्रमुख प्रशासकीय अधिकृत प्रमोद घिमिरे, एकल महिला समूह धनुषाकी अध्यक्ष सुभद्रा आले, राष्ट्रिय मानव अधिकार आयोग प्रदेशका कार्यालयका प्रतिनिधी, ईलाका प्रहरी कार्यालय महेन्द्रनगरका ईन्सपेक्टर बेचन यादव लगायतले आ-आफ्ना विचार राख्नु भएको थियो ।
कार्यक्रमको संचालन एकल महिला समूहकी प्रादेशिक अधिकृत कृष्णा बस्नेतले गरेकी थिईन् । मानव अधिकारको लागि महिला तथा एकल महिला समूह धनुषाको आयोजना र KURVE Wustrow को सहयोगमा सो गोष्ठी आयोजना गरिएको थियो ।
