स्वागतम खबर
ढल्केवर, बैशाख १२ ।
धनुषाको मिथिला नगरपालिकाका मेयर पदमा नेकपा एमालेको तर्फबाट राजाराम महतोले मनोनयन दर्ता गराएका हुन् । निवर्तमान मेयर हरिनारायण महतोसँग अन्तिम समयमा टिकट खोसेर राजारामलाई उम्मेदवार बनाएपछि उनले उम्मेदवारी दर्ता गराएको हुन् । एमालेको तर्फबाट मेयरमा राजाराम महतोले मनोनयन दर्ता गराएको निर्वाचन अधिकृत दिपक धितालले जानकारी दिएका छन् ।
यस्तै एमालेले उपमेयरमा सुनिता सिंह बुढाथोकीलाई उम्मेदवार बनाएको छ । यता यसअघि एमालेबाट मेयर बनेका महतोले यस पटक पार्टीले टिकट खोसेपछि पुनः मेयर पदमा स्वतन्त्र रुपमा मनोनयन दर्ता गराएका छन् । निवर्तमान मेयर हरिनारायण महतोले मेयर पदमा स्वतन्त्र रुपमा मनोनयन दर्ता गराएको निर्वाचन अधिकृत धितालले बताए ।
अन्तिम समयमा पार्टीको टिकटबाट विमुख भएका हरिनारायण महतोले नेकपा एमाले परित्याग गर्दै स्वतन्त्रबाट मेयर पदमा उम्मेदवारी दिएका छन् । उम्मेदवारी दिनुअघि निवर्तमान मेयर महतोले पार्टीको साधारण सदस्य समेत नरहने गरि पार्टीबाट राजीनामा दिएको घोषणा गरेका थिए ।
पार्टीको नगर कमिटीले एमालेबाट पुनः मेयरका लागि एकल सिफारिस भएर चुनावी प्रचारप्रसारमा जुटिरहेको बेला हरिनारायणको टिकट खोसेर अन्तिम समयमा राजाराम महतोलाई मेयरको टिकट दिएपछि हरिनारायण पक्षका नेताकार्यकर्ता रुष्ट बनेका छन् । एमालेबाट मेयरमा उम्मेदवारी दर्ता गराएका राजाराम महतो रियलस्टेट व्यावसायी हुन् ।
