काठमाडौं, बैशाख १४ ।
पालिका चुनावका लागि उम्मेदवारी दर्ता गराएकाहरुको विरुद्धमा परेको उजुरीमाथि आजदेखि जाँचबुझ सुरु भएको छ । आज र भोलि जाँचबुझ गरिने र शुक्रवार १६ गते उम्मेदवारले नाम फिर्ता र अन्तिम नामावली प्रकाशन गर्ने कार्यतालिका छ ।
पालिका जनप्रतिनिधी बन्नका लागि बैशाख ११ १२ गते उम्मेदवारी दर्ता गराएका केही उम्मेदवारहरुको विरुद्धमा मंगलबार ठाउँ ठाउँमा दाबी विरोधको उजुरी दर्ता भएको छ । ललितपुर महानगरपालिकामा पाँच दलीय गठबन्धनबाट मेयरको उम्मेदवार रहेका चिरिबाबु महर्जन विरुद्ध बेरुजु फर्छ्यौट नगरेको भन्दै उजुरी परेको छ । यस्तै ललितपुर महानगरपालिकामा एमालेका तर्फबाट उपमेयरमा उम्मेदवारी दिएकी मञ्जली शाक्य विरुद्ध २०७४ सालको प्रदेश सभा चुनावमा समानुपातिकतर्फको बन्द सूचीमा नाम रहेको भन्दै उजुरी परेको छ । अरु पालिकामा पनि केही उम्मेदवार विरुद्ध उजुरी परेको छ ।
नेपाल सरकार, प्रदेश सरकार तथा नेपाल सरकार वा प्रदेश सरकारको स्वामित्व वा नियन्त्रणमा रहेको वा नेपाल सरकारबाट अनुदान प्राप्त संस्थामा पारिश्रमिक पाउने गरी बहाल रहेको उम्मेदवार माथि उजुरी दिन सकिन्छ । यस्तै भ्रष्टाचार, जबरजस्ती करणी, मानव बेचबिखन तथा ओसारपसार, लागू औषध बिक्री वितरण तथा निकासी वा पैठारी, सम्पत्ति शुद्धीकरण, राहदानी दुरुपयोग, अपहरण सम्बन्धी कसूर वा नैतिक पतन देखिने व्यक्ति पनि उम्मेदवार हुन पाउँदैनन् ।
यस्तै जातीय भेदभाव तथा छुवाछुत, बोक्सी वा बहुविवाह सम्बन्धी कसुरमा कैदको सजाय पाइ त्यस्तो सजाय भुक्तान गरेको मितिले तीन वर्ष पूरा नभएको व्यक्तिले उम्मेदवारी दिएको भए उसको उम्मेदवारी पनि रद्द हुन सक्ने आयोगले जनाएको छ ।
यसैबीच राजनीतिक दल र दलका उम्मेदवारहरुले उम्मेदवारी दर्ताको क्रममा ठाउँ ठाउँमा निर्वाचन आचारसंहिताको उल्लंघन गरेको समेत पाइएको छ । मनोनय दर्ता गराउने जाने क्रममा उम्मेवारहरुले रैलीमा बालबालिकालाई झण्डा बोकाएर प्रयोग गरेको, टिर्सट, टोपी, व्याच, झण्डा लगायतको प्रयोग गरी आचारसंहिता विपरित कार्य गरेको देखिएको थियो । यसमा विषयमा पनि उजुरी परेको भए जाँचबुझ भईरहेको आयोगले जनाएको छ । दलहरुकै सहमतिमा आचार संहिता लागु गरेकोले त्यसको पालना गर्नुपर्ने कार्यमा गम्भीर बन्न आयोगले आग्रह समेत गरेको प्रवक्ता शालिग्राम शर्मा पौडेलले जानकारी दिएका छन् ।
