स्वागतम खबर
काठमाडौं, बैशाख १७ ।
यहि बैशाख ३० गते हुने पालिका चुनावको लागि उम्मेदवारी दिएकामध्ये ४ हजारभन्दा बढी उम्मेदवारले आफ्नो उम्मेदवारी फिर्ता लिएका छन् । बैशाख ११ र १२ गते मनोनयन दर्ता गराएका उम्मेदवारलाई शुक्रवार साँझ ५ बजेसम्म फिर्ता लिन समय दिइएको थियो । तर अझै पनि तथ्याङ्क सङ्कलनको काम भइरहेकाले फिर्ता लिनेको सङ्ख्या थपघट हुन सक्ने निर्वाचन आयोगले जनाएको छ ।
आयोगका अनुसार देशभरबाट एक लाख ५३ हजार २ सय २० जना उम्मेदवार छन् । चुनावी कार्यतालिकाअनुसार आज उम्मेदवारलाई चुनाव चिह्न प्रदान गरिने छ । स्वतन्त्र उम्मेदवराको संख्या बढी भएकाले चुनाव चिन्हको पनि अभाव हुने अवस्था रहेको आयोगले जनाएको छ ।
सत्ता गठबन्धनले स्वतन्त्र उम्मेदवारी दिएकाहरुलाई फिर्ता लिन दबाब दिए पनि भरतपुर, पोखरा, जनकपुरधाम लगायतका ठाउँमा उम्मेदवारी कायमै छ । भरतपुरमा कांग्रेसका पूर्वसांसद जगन्नाथ पौडेलले स्वतन्त्र उम्मेदवारी कायम राखेपछि त्यहाँको चुनाव रोचक हुने देखिएको छ । पौडेलको उम्मेदवारी फिर्ता लिन निकै कोसिस भएको थियो । यस्तै पोखरामा कांग्रेसका नेता विमल कार्कीले पनि स्वतन्त्र उम्मेदवारी फिर्ता लिनुभएको छैन । गठबन्धनको तर्फबाट चितवन माओवादी केन्द्र र पोखरामा एकीकृत समाजवादीको भागमा परेको थियो । यस्तै जनकपुरधाम उपमहानगरपालिकामा कांग्रेसबाट बागी भई स्वतन्त्र रुपमा उममेदवारी दिएका उम्मेदवार मनोज साहले पनि उम्मेदवारी फिर्ता लिएको छैन् ।
यसैबीच पालिका चुनावमा एमालेका उम्मेदवार सबैभन्दा बढी छन् । आयोगका अनुसार एमालेले सबै पदमा गरी ३३ हजार ५ सय ३ जना उम्मेदवार उठाएको छ । यस्तै पालिका चुनावको लागि देशभरबाट १२ हजार ७ सय ८९ जनाले स्वतन्त्र उम्मेदवारी दिएका छन् । ३५ हजार २ सय २१ पदका लागि यहि बैशाख ३० गते मतदान हुनेछ ।
