स्वागतम खबर
महेन्द्रनगर, जेठ ८ ।
धनुषाको क्षीरेश्वरनाथ नगरपालिकाको मेयरमा नेकपा एमालेका सुखदेव यादव निर्वाचित भएका छन् । नेपाली कांग्रेसका जिल्ला सभापतिलाई हराउँदै नेकपा एमालेका मेयर उम्मेदवार यादव निर्वाचित भएका छन् । निवर्तमान मेयर पजियारलाई एमालेका उम्मेदवार सुखदेव यादवले ६१३ मत अन्तरले पराजित गरेका हुन् ।
आइतवार आएको अन्तिम मतपरिणाम अनुसार एमालेका सुखदेव यादव ७ हजार ९१३ मत ल्याएर निर्वाचित भएका हुन् । उनका निकटतम प्रतिद्वन्दी कांग्रेसका जिल्ला सभापति एवं निवर्तमा मेयर योगेन्द्र पजियारले ७ हजार ३ सय मत ल्याएका छन् ।
२०७४ को स्थानीय तहको चुनावमा पनि हाल एमालेका मेयरका उम्मेदवार सुखदेव यादव र काँग्रेसका उम्मेदवार निवर्तमान मेयर समेत रहेको योगेन्द्र पजियार बीच कडा नै टक्कर भएको थियो । त्यतिबेला यादव उपेन्द्र यादव नेतृत्वको जसपाबाट उम्मेदवार बनेका थिए र काँगे्रस संग हार व्यहोरेका थिए । यस पटक यादव एमालेमा प्रवेश गरेर मेयरको उम्मेदवार बन्दै जीत हासिल गर्न सफल भएका छन् ।
यस्तै उपमेयरमा नेपाली कांग्रेसकी रचना माथेमा श्रेष्ठ निर्वाचित भएकी हुन् । उनले ७ हजार ५५० मत ल्याएकी हुन् भने उनको निकटतम प्रतिद्वन्दी नेकपा एमालेकी सालिनी चौधरीले ७ हजार ५११ मत ल्याइन् ।क्षीरेश्वरनाथ नगरपालिकाको १० वटै वडामध्ये ८ वटा वडामा नेपाली कांग्रेसका वडाध्यक्ष निर्वाचित भएका छन् भने दुई वटा वडामा नेकपा एमालेका वडाअध्यक्ष विजयी भएका छन् ।
क्षीरेश्वरनाथ नगरपालिका वडा नं. ६ र ९ मा एमालेका उम्मेदवार वडाअध्यक्षमा विजयी भएका छन् भने बाँकी सबै वडामा कांग्रेसका उम्मेदवार विजयी भएका छन् ।
