विनोद महतो
ढल्केवर, असार १४ ।
महोत्तरीको बर्दिवासमा संचालित ४ दिने विपद् जोखिम न्यूनिकरण तथा जलवायु परिवर्तन अनुकूलन प्रशिक्षक प्रशिक्षण (तालिम) मंगलबार सम्पन्न भएको छ । मिथिला नगरपालिकाका उपमेयर सुनिता सिंह बुढाथोकीको अध्यक्षता तथा मधेश प्रदेशका गृह तथा संचार मन्त्रालयका सचिव रामकुमार महतोको प्रमुख आतिथ्यमा सो प्रशिक्षक प्रशिक्षण तालिम समापन गरिएको छ ।
तालिममा मधेश प्रदेशका ८ वटै जिल्लाबाट ३२ जनालाई विपद् जोखिम न्यूनिकरण तथा जलवायु परिवर्तन अनुकुलन प्रशिक्षक प्रशिक्षण दिइएको छ । सो तालिममा प्रदेशका ८ वटै जिल्लाका १६ वटा पालिका र १६ वटा गैर सरकारी संस्थाका प्रतिनिधीहरुको सहभागिता रहेको थियो । समापनको अवसरमा तालिममा सहभागीहरुलाई प्रमुख अतिथि सचिव महतोले प्रमाण पत्र प्रदान गर्नुभएको थियो ।
धनुषाको मिथिला नगरपालिकाको आयोजना तथा युनिसेफको सहयोग र संघीय मामिला तथा सामान्य प्रशासन मन्त्रालय, गृह तथा संचार मन्त्रालय मधेश प्रदेश, स्थानीय विकास प्रशिक्षण प्रतिष्ठान एवं राष्ट्रिय विपद् जोखिम न्यूनिकरण तथा व्यवस्थापन प्राधिकरणको समन्वय र सहजीकरणमा असार १० गतेदेखि सो प्रशिक्षक प्रशिक्षण संचालन गरिएको थियो ।
तालिम समापनको अवसरमा युनिसेफका जनकपुर फिल्ड अफिस प्रमुख अनिता दहाल, युनिसेफका विपद् व्यवस्थापन शाखाका अशोक झा, मिथिला नगरपालिकाका संजिव घिमिरे लगायतको उपस्थिति रहेको थियो ।
प्रशिक्षक तालिममा सहभागीहरुलाई अफ्नो काम, कर्तव्य र अधिकारको बोध गराई स्थानीय तहहरुलाई विपद् जोखिम न्यूनिकरण तथा जलवायु परिवर्तन अनुकूलन सम्बन्धी ऐन, नियमावली, सुरक्षाका उपाय लगायतको विषयमा अभ्यास सहितको प्रशिक्षण दिइएको आयोजक मिथिला नगरपालिकाका सूचना अधिकारी दिपेश काफ्लले बताउनुभयो ।
यो चारदिने प्रशिक्षक प्रशिक्षणले सहभागीहरुलाई विपद् जोखिम न्यूनिकरण तथा जलवायु परिवर्तन अनुकूलन सम्बन्धी ऐन, नियमावलीमा भएका प्रावधानहरु प्रभावकारी रुपमा कार्यान्वय र मूलप्रवाहीकरण गर्न सक्षम बनाउने अपेक्षा गरिएको छ ।
स्थानीय सरकार संचालन ऐन, २०७४ ले स्थानीय तहहरुलाई विपद् व्यवस्थापन तथा जलवायु परिवर्तन अनुकूलन सम्बन्धी गर्नुपर्ने काम, कर्तव्य र अधिकार तोकेको छ । नेपाल सरकारले समेत विपद् जोखिम न्यूनिकरण तथा जलवायु परिवर्तन अनुकूलन सम्बन्धी कार्य गर्न विभिन्न अन्तर्राष्ट्रिय महासन्धिहरुमा प्रतिबद्धता जनाईसकेको छ । जसलाई मूलप्रवाहीकरणका लागि स्थानीय तहको अहम भूमिका रहेकाले सो प्रशिक्षक प्रशिक्षण तालिम संचालन गरिएको जनाइएको छ ।
