स्वागतम खबर
महेन्द्रनगर, असार १४ ।
सर्लाहीको बरहथवा नगरपालिकामा समावेशी विकासको आवश्यकता सम्बन्धी नवनिर्वाचित जनप्रतिनिधीसँग सपोर्ट नेपालले मंगलबार अन्तरक्रिया कार्यक्रम गरेको छ । बरहथवा नगरपालिकाको मेयर कल्पना कटुवालको अध्यक्षतामा भएको सो अन्तरक्रिया कार्यक्रममा नगरपालिकाका नवनिर्वाचित जनप्रतिनिधीहरुलाई बधाई सहित सम्मान गर्दै समावेशी विकासको आवश्यकता सम्बन्धी छलफल गरिएको थियो ।
कार्यक्रममा सपोर्ट नेपालका अध्यक्ष रोशना खड्काले जनप्रतिनिधीहरुलाई खादा र माला लगाउँदै कार्यकालको शुभकामना र बधाई दिँदै सम्मान गर्नुभएको थियो ।
जनप्रतिनिधीहरुलाई सम्मान पश्चात उनीहरुसँग समावेशी विकासको आवश्यकता तथा नीति कार्यक्रम र बजेट व्यवस्थापन सम्बन्धी अन्तरक्रिया गरिएको सपोर्ट नेपालका कार्यक्रम संयोजक प्रकाश ठाकुरले जानकारी दिनुभयो ।
सो क्रममा सपोर्ट नेपालका कार्यक्रम व्यवस्थापक श्याम नेपालीले बरहथवा नगरपालिका र सपोर्ट नेपालबीचको स्थानीय विकास सम्बन्धी सहकार्यको दृष्टान्त, कार्यात्मक सम्बन्ध, कार्यानुभव, विकास सम्बन्धी बुझाई र सुझाव तथा हाल संचालनमा रहेको ‘सद्भाव’ परियोजनाको विषयमा सहजीकरण गर्नुभएको थियो ।
सपोर्ट नेपालले मधेश प्रदेशको धनुषा जिल्लाको सर्लाही जिल्लाको बरहथवा नगरपालिक र धनुषाको क्षीरेश्वरनाथ नगरपालिकामा गरी दुई वटा पालिकामा हाल ‘सद्भाव’ परियोजना संचालन गर्दै आएको जनाएको छ ।
संघीय संरचनामा जनताको पहुँच, सहभागिता र लाभको वितरणमा सामाजिक समूहरुबीच हुने प्रतिस्पर्धाको जोखिमलाई न्यूनिकरण गर्न र अन्तर समुदाय तथा स्थानीय सरकारहरुबीच साझेदारी एवं दिगो सम्बन्ध निर्माणमा योगदान पुग्याउने परियोजनाको उद्देश्य रहेको स्पोर्ट नेपालका व्यवस्थापक नेपालीले बताउनुभयो । निर्धन तथा सिमान्तकृत समूहहरुको सामाजिक, आर्थिक र सांस्कृतिक अधिकार तथा अवसरहरुको प्रत्याभूतिका लागि न्यूनतम कानुनी तथा नीतिगत संरचना र संयन्त्रहरुको स्थापनामा योगदान गर्ने लक्ष्य सहित परियोजना संचालन गर्दै आएको छ ।
कार्यक्रममा नगरपालिकाका नवनिर्वाचित मेयर, उपमेयर, प्रमुख प्रशासकीय अधिकृत, वडाअध्यक्ष, कार्यपालिका सदस्य र वडासदस्यहरुको उपस्थिति रहेको थियो ।
