विनोद महतो
ढल्केवर, असार २० ।
धनुषाको मिथिला नगरपालिका वडा नं. २ नक्टाझिजमा नगरस्तरीय नागरिक आरोग्य सेवा केन्द्र संचालन भएको छ । नक्टाझिजको साविक वडा नं. ६ स्थित एभरेष्ट युवा क्लवको भवनमा आयुर्वेदिक पद्धतीबाट स्वास्थ्य उपचार सेवा उपलब्ध गराउन नगरस्तरीय नागरिक आरोग्य सेवा केन्द्र संचालन गरिएको छ । मिथिला नगरपालिकाका प्रमुख महेन्द्र महतो र उप मेयर सुनितासिंह बुढाथोकीले सोमबार विहान सो आरोग्य सेवा केन्द्रको उद्घाटन गरेपछि संचालनमा आएको छ ।
आरोग्य केन्द्रको उद्घाटन गर्दै नगर प्रमुख महतोले आयुर्वेदिक पद्धतिबाट उपचारका लागि अब नागरिकलाई सहज हुने विश्वास व्यक्त गर्नुभयो । आयुर्वेदिक औषधी सेवन गर्ने विरामीहरुलाई स्वास्थ्य जाँच र उपचार गराउन अब जनकपुर जानुपर्ने अवस्थाको अन्त्य भएको र यहिबाट सेवा लिन नगरबासीलाई उहाँले आग्रह गर्नुभयो । हाल सानो कोठामा सुरु भएको नागरिक आरोग्य सेवा केन्द्रलाई भविष्यमा जनचाहना अनुसार विस्तार गर्ने प्रमुख महतोले प्रतिबद्धता समेत जनाउनुभयो । अंग्रेजी औषधीको विस्तार नभएको बेला आयुर्वेदिक औषधीले नै उपचार हुँदै आएको भएपनि पछिल्लो समय रोग छिटो छिटो निको पार्न अंग्रेजी औषधीको प्रभाव बढ्दै गएको हुन सक्ने उहाँको भनाई थियो । तर शरीरमा कुनै पनि साइड इफेक्ट नगर्ने आयुर्वेदिक औषधी नै प्रयोग गर्दा रोग पनि निको हुने र शरीरलाई कुनै असर पनि नहुने यर्थातलाई जागरुकताको मार्फत बैद्यहरु जनमानसमा सन्देश दिनुपर्ने प्रमुख महतोको जोड थियो ।
यता सोहि कार्यक्रमलाई सम्बोधन गर्दै मिथिला नगरपालिकाका उप प्रमुख सुनिता सिंह बुढाथोकीले अबको विद्यालय शिक्षामा नै आयुर्वेद र योगाभ्यासलाई अगाडी बढाउनु पर्नेमा जोड दिनुभयो । नागरिकलाई आरोग्य बनाउन योगाको शिक्षक तयार गरेर विद्यालयहरुमा अभियानको रुपमा योगअभ्यास र आयुर्वेद शिक्षा विस्तार गर्नुपर्ने रणनीतिका साथ आफुहरु अघि बढिरहेको उहाँ भनाई थियो ।
जनकपुर आयुर्वेद औषधालय धनुषाका प्रमुख डा. सीमा झाले पालिकाहरुमा पनि आरोग्य सेवा केन्द्र संचालन गर्ने सरकारको योजना अनुसार नै मिथिला नगरपालिकामा नगरस्तरीय आरोग्य केन्द्र संचालन गरिएको बताउनुभयो । आरोग्य केन्द्रमा कर्मचारी बाहेक सबै व्यवस्थापनको कार्य नगरपालिकाले नै गर्नु पर्ने र हेर्नुपर्ने नीति रहेको प्रमुख झाले स्पष्ट गर्नुभयो । नेपाल सरकारले हाल २३ प्रकारको आयुर्वेदिक औषधी उपलब्ध गराई रहेका जानकारी दिँदै प्रमुख झाले अब यसको औषधी व्यवस्थापनको जिम्मेवारी नगरपालिकाको स्वास्थ्य शाखाको नै भएकोले यसको नियमित संचालन र व्यवस्थापन कार्यमा नगरपालिकालाई सहयोग गर्न आग्रह समेत गर्नुभयो ।
सो आरोग्य केन्द्रको ईन्चार्जको जिम्मेवारी कविराज प्रेम महतोलाई दिएको छ । केन्द्रमा विरामी जाँच गरिनुका साथै आवश्यक आयुर्वेदिक औषधी समेत उपलब्ध हुने ईन्चार्ज महतोले बताउनुभयो ।
जनकपुर आयुर्वेद औषधालय धनुषाका प्रमुख डा. सीमा झाको अध्यक्षता तथा नगर प्रमुख महतोको प्रमुख आतिथ्यमा नागरिक आरोग्य सेवा केन्द्रको उदघाटन गरिएको थियो । सो अवसरमा मिथिला नगरपालिकाका उप प्रमुख सुनिता सिंह बुढाथोकी, वडाअध्यक्ष विहारी महतो, नगरपालिकाका स्वास्थ्य संयोजक अशोक भण्डारी, लगायत वडासदस्यहरु, विभिन्न राजनीतिक दलका प्रतिनिधीहरु, क्लवका अध्यक्ष श्याम महतो, औषधालयका बैद्य, कविराज, कर्मचारी लगायत स्थानीयहरुको उपस्थिति रहेको थियो ।
आरोग्य सेवा केन्द्र संचालनका लागि मिथिला नगरपालिकाले आवश्यक टेबुल, कुर्सी दराज लगायत सामग्रीहरुको उपलब्ध गराएको छ भने एभरेष्ट युवा क्लवले तत्कालका लागि सहयोग स्वरुप भवन उपलब्ध गराएको क्लवका अध्यक्ष महतोले बताउनुभयो ।
