दिवेश कुमार महतो
ढल्केवर, असार २० ।
धनुषाको मिथिला नगरपालिका ढल्केवरले पहिलो पटक यौनिक अल्पसंख्यकलाई सम्मान गरेको छ । नगरपालिकाको महिला बालबालिका तथा ज्येष्ठ नागरिक शाखाले आइतवार ढल्केवरमा एक कार्यक्रमको आयोजना गरी यौनिक अल्पसंख्यकलाई सम्मान गरेको छ । शाखा प्रमुख भगवति गजुरेलको अध्यक्षता तथा नगरपालिकाका उप प्रमुख सुनितासिंह बुढाथोकीको प्रमुख आतिथ्यमा यौनिक अल्पसंख्यकहरूलाई माला, टिका लगाई दोसल्ला ओढाएर नगद सहित सम्मान गरेको छ ।
नगरपालिकाले दिएको जानकारी अनुसार निल हिरा समाज जनकपुरधामका मुस्कान शर्मा, जुनु चौधरी, मालती महासेठ, जसोधा राई, ममता याख, शान्ति यादव, छोटु साह (सत्यनारायण), प्रदिप यादव लगायतका यौनिक अल्पसंख्यकहरूलाई सम्मान गरिएको हो ।
जिल्लाको १८ वटै पालिका मध्ये यौनिक अल्पसंख्यकहरूलाई सम्मान गर्ने मिथिला नगरपालिकाले जिल्लामै पहिलो नगरपालिका बनेको छ । यौनिक अल्पसंख्यकहरूको पनि हरेक क्षेत्रमा सम्मानजनक सहभागीता हुनुपर्छ र शिक्षा बाट बञ्चित नगरियोस् भन्ने उद्देश्यका साथ सम्मान गरिएको प्रमुख अतिथि मिथिला नगरपालिकाका उप प्रमुख सुनितासिंह बुढाथोकीले बताउनुभयो ।
महिला पुरुषलाई मात्र सम्मानजनक भावनाले हेरिएको समाजमा यौनिक अल्पसंख्यकहरूको जनजिवन पिडादायी बनि रहेको अवस्थामा यो सम्मानले पक्कै पनि उहाँहरुलाई केही हौसल्ला मिलेको हुन सक्ने उप प्रमुख बुढाथोकीले विश्वास व्यक्त गर्नुभयो ।
यता समाजमा तेस्रो लिंङगीलाई पनि सम्म्मान पूर्वक बाँच्ने अधिकार रहेको र आफुहरुले पनि सम्मान नागरिक जस्तै सेवा सुविधा पाउनु पर्ने कुरालाई व्यापक रुपमा उठाइरहेको बेला मिथिला नगरपालिकाले सम्मान गरेर आफुहरुको जीवनमा हौसल्ला थपेको निलहिरा समाज जनकपुरधाम संयोजक प्रदिप यादवले बताउनुभयो ।
संयोजक यादवले यौनिक अल्पसंख्यकहरूलाई राज्यपक्षबाट नै विभेद गरिएको झन्झटिलो प्रावधान ल्याएर नागरिकताको अधिकारबाट बञ्चित गर्न खोजिएको गुनासो गर्नुभयो । उहाँले तेस्रो लिङ्गी भएकाहरुलाई चिकित्साबाट प्रमाणित मेडिकल प्रमाण सहित पेस गर्न र सिडिओ कार्यालयमा दौडधुप गर्नुपर्ने अवस्था रहेको र कुनै पनि सरकारी कार्यालय, राजीनतिक क्षेत्रमा पुरुष महिला बाहेक तेस्रो लिङ्गी भएकाहरुलाई सहभागी नगराएकोले राज्य पक्षबाटै आफुहरुमाथि विभेद गरिएको दुखेसो पोख्नुभयो । आफुहरुलाई शिक्षाबाट बञ्चित गराउँदा अपहेलित हुने अवस्था देखिएको र सरकारले पहिचान अनुसारको नागरिकता दिन पनि नसक्दा आफुहरु समाजमा अपहेलित जीवन जिउन बाध्य भएको उहाँको भनाई थियो । जानी जानी कोहि तेस्रो लिंङ्गी नबनेको हो, जन्मिने प्रक्रियामा नै यो प्रकृतिले नै आफुहरुसँग अन्याय गरेको र भौतिक संसारमा यहाँको समाज र सरकारले पनि आफुहरुमाथि नै अन्याय गरेको हुँदा आफुहरु कहाँ जाने, कहाँ गएर बस्ने, कुन लोकमा जाने भनेर प्रश्न समेत गर्नुभयो ।
उक्त कार्यक्रममा टिपीओ नेपाल, एसिया फाउन्डेसन, मिथिला नगरपालिकाको शिक्षा शाखा, मिथिला नगर युवा संजाल, मानव अधिकार समिति मिथिला नगरपालिका, मिथिला विकास संस्थान मिथिला नगरपालिका, मिथिला नगर बाल संजाल ढल्केवर, ईलाका प्रहरी कार्यालय ढल्केवर, लङघाली युवा समाजका प्रतिनिधिहरुको उपस्थिति रहेको थियो ।
