स्वागतम खबर
ढल्केवर, भाद्र १ ।
नेकपा एकिकृत समाजवादी पार्टी धनुषाको जिल्ला कार्यसमितिका वरिष्ठ उपाध्यक्ष सोमप्रसाद शर्मासहित सयौं नेता कार्यकर्ताले पार्टी परित्याग गरेका छन् । बुधबार बिहान ढल्केवरमा पत्रकार सम्मेलनको आयोजना गरेर उनीहरुले पार्टी परित्यागको घोषणा गरेका हुन् ।
पार्टी परित्यागको घोषण गर्दै शर्माले मिथिला नगरपालिकामा १ सय २१ जनाको कार्यसमिति मध्ये ७३ जनाले आजकै दिनदेखि पार्टी परित्याग गरेको बताउनु भयो । उहाँले जिल्ला कार्यसमितिका २५ जना सदस्यले पार्टी परित्याग गर्ने तयारीमा जुटेको जानकारी समेत दिनुभयो ।
नेकपा एकिकृत समाजवादीका नेतृत्वकर्ताले भागबन्डाको राजनीति गर्ने गरेको, श्रीमती र नातागोतालाई राजनीति अवसर प्रदान गर्ने गरेको जस्ता दुःखद् अवस्था सिर्जना भएको र रुपान्तरण हुने अवस्था नदेखिएपछि आफुहरु सामूहिक रुपमा पार्टी परित्याग गरेको नेता शर्माले बताउनुभयो ।
उहाँले पत्रकार सम्मेलनमा भन्नुभयो,– ‘आजकै मितिदेखि हामी नेकपा एसमा कुनै पनि पदमा छैनौं, पार्टी परित्यागको घोषणा गर्दछु, एक हप्ता भित्र छलफल गरेर कुन पार्टीमा आबद्ध हुने भन्ने कुराको जानकारी यहाँहरुलाई दिनेछु ।’
पार्टी परित्याग गरेका साथीबीच गहन छलफल गरेर एक हप्ताभित्रमा रुपान्तरणका सहयात्री बन्न सकिने पार्टीमा आवद्ध हुने उहाँले भन्नुभयो ।
यता पत्रकार सम्मेलनमा पार्टी परित्यागपछि कुन पार्टीमा प्रवेश गर्ने पत्रकारहरुको प्रश्नको जवाव दिँदै शर्माले स्पष्ट जानकारी नदिएपनि आफ्नो पुरानै घर नेकपा एमालेमा फर्किन सक्ने संकेत गर्नुभएको छ ।
पत्रकार सम्मेलनमा पार्टी परित्याग गर्दै गर्दाको भिडियो
