स्वागतम खबर
महेन्द्रनगर, असोज १६ ।
धनुषाको क्षीरेश्वरनाथ नगरपालिकास्थित सखुवा महेन्द्रनगरमा बडा दशैंको अवसरमा लगाइएको दशैं सस्ता बजार आइतबार समापन गरिएको छ । नेपालीहरुको महान चाड बडादशैंको अवसरमा क्षीरेश्वरनाथ उद्योग वाणिज्य संघको आयोजनामा संचालन भएको दशैं बजार समापन गरिएको हो ।
सो अवसरमा संघले दशैं बजार लगाउने कार्यमा सहयोग गरेका सहयोगी संघसंस्था र व्यक्तिहरुलाई सम्मान समेत गरेको छ । क्षीरेश्वरनाथ उद्योग वाणिज्य संघका अध्यक्ष सुरेश प्रसाद यादवको अध्यक्षता तथा मधेश प्रदेश उद्योग पर्यटन तथा वनमन्त्री शत्रुधन महतोको प्रमुख आतिथ्यमा दशैं सस्ता बजारको समापन तथा सम्मान कार्यक्रम गरिएको छ ।
समापन कार्यक्रममा रेडियो स्वागतम लगायत दर्जनौैं संघसंस्था तथा व्यक्तिहरुलाई सम्मान गरिएको संघका सचिव अजय कुमार महतोले जानकारी दिनुभयो । संघले यो सँगै तेस्रो पटक महेन्द्रनगरको सखुवा रोडस्थित जैसी बाबा धर्मशालामा दशैं सस्ता बजार लगाएको थियो ।
घटनास्थापनाको दिन सोमबार बजारको शुभारम्भ गरिएको थियो । सस्ता बजारमा लताकपडा, जुताचप्पल, साबुन सरफ, विद्युतीय, खाद्यान्न, दैनिक उपभोग्य लगायत घरमा प्रयोग हुने विभिन्न समानहरुको स्टल बजार भन्दा सस्तो दरमा उपभोक्ता ग्राहकहरुलाई विक्री गरिएको संघका उपाध्यक्ष तथा दशैं बजारका संयोजक विनय कुमार साहले बताउनुभयो ।
