स्वागतम खबर
महेन्द्रनगर कार्तिक ७ ।
धनुषाको कसमस सिमेन्ट उद्योगमा कार्यतर एक मजदुरको लडेर ज्यान गएको छ । उद्योगमा कार्यरत दाङ्ग जिल्लाको गढवा गाउँपालिका ६ घर भएका ३१ वर्षीय शरत रावतको लडेर ज्यान गएको प्रहरीले जनाएको छ ।
मिथिला नगरपालिका २ नक्टाझिजस्थित कसमस सिमेन्ट उद्योग (तेज सिमेन्ट) मा काम गर्दै आएका रावत लडेर तल झरेको र मृत्यु भएको अवस्थामा सोमबार लास भेटेको छ । दिपावलीको अवसरमा आइतवार फैक्ट्रीमा विदा रहेको समयमा वेल्डरको रुपमा कार्यरत रावत खाना खाएर क्लिंकर चिस्याउने कुलरमाथि वाइफाइ चलाउन चढेको र त्यहीँबाट तल खसेर ज्यान गएको प्रहरीले जनाएको छ ।
रावतको लास घटनास्थलमै रहेको र मृतक मजदुरको पारिवारिक सदस्य आएपछि मंगलबार मात्र लास उठाउने र पोष्टमार्टका लागि पठाउने बताइएको छ । यता घटना विषयमा अनुसन्धान भईरहेको ईलाका प्रहरी कार्यालय महेन्द्रनगरको प्रहरी निरिक्षक बेचन यादवले जानकारी दिएका छन् ।
