जलाद खोलामा मापदण्ड विपरित उत्खनन् गर्ने ट्रायक्टर स्थानीयको नियन्त्रणमा

स्वागतम खबर
जनकपुरधाम, कार्तिक ११ गते ।
धनुषाको जलाद खोलामा मापदण्ड विपरित खोला उत्खनन् गरेको भन्दै शुक्रवार स्थानीयहरुले ५ वटा ट्रेक्टर नियन्त्रणमा लिएका छन् । क्षीरेश्वरनाथ नगरपालिका ८ दिगम्वरपुरका स्थानीयबासीहरुले जलाद खोलामा मापदण्ड विपरित उत्खनन् गरेको भन्दै खोलाबाट ५ वटा ट्रेक्टर नियन्त्रणमा लिएको छ ।
जलाद खोलामा मापदण्ड विपरित बालुवा उत्खनन् गर्दै गहिरो खाल्डो बनाएको र खेतको छेउमै गएर खन्दा पनि नगरपालिका र प्रहरी प्रशासनले कुनै चासो नलिएपछि आक्रोशित स्थानीयहरुले दुई बकेट लागेको ट्रेक्टर र ३ ओटा ढुवानी गर्ने टे«क्टर नियन्त्रणमा लिएको स्थानीय मोहन प्रसाद सिंहले बताउनुभयो ।
प्रहरी प्रशासनकै संरक्षणमा क्रसरधनी र गाडी धनीहरु खोला उत्खनन्मा लागेको स्थानीयबासी सिंहको आरोप छ । जलाद खोलामा पुलको नजिक र र आसपासकै क्षेत्रमा मापदण्ड विपरित बालुवा गिटी उत्खनन् गर्दै आएको स्थानीयहरुको भनाई छ । स्थानीयहरुले नियन्त्रणमा लिएको ट्रेक्टरहरुमा प्र.२–०२–००१ लगायत अन्य ट्रेक्टरहरुमा नम्बर समेत नरहेको देखिएको छ । सो ट्रेक्टर स्थानीय क्रसर व्यवसायीकै रहेको स्थानीयहरुले बताएका छन् ।
यता क्षीरेश्वरनाथ नगरपालिका वडा नम्बर ८ का वडाअध्यक्ष मोद कुमार महतोले खोलामा ट्रक्टर लगाएर मापदण्ड विपरित बकेटले उत्खन्न गरिरहेको अवस्थामा स्थानियहरु नियन्त्रणमा जानकारी दिनुभयो । विगतका दिनमा पनि मापदण्ड विपरित खोला उत्खनन् गरेकोमा पटक पटक सम्झाएर उत्खनन् नगर्ने शर्तमा छोडेको भएपनि उत्खनन् नरोकेपछि बाध्य भएर स्थानीयहरुले ट्रेक्टर नियन्त्रणमा लिनु परेको उहाँले भन्नुभयो ।
नियन्त्रणमा लिएको ट्रेक्टर स्थानिय प्रशासनलाई जिम्मा लगाउने र अगामी दिन फेरी पनि मापदण्ड विपरितको उत्खनन् रोकिएन भने स्थानिय प्रशासन र सरोकारवाला विरुद्ध कडा आन्दोलन गर्ने स्थानीयहरु चेतावनी समेत दिएका छन् ।