स्वागतम खबर
ढल्केवर, पौष १ ।
धनुषाको मिथिला नगरपालिका २ नक्टाझिजमा शुक्रवार वडास्तरीय प्रारम्भिक बाल विकास समिति गठन गरिएको छ । वडाअध्यक्ष विहारी महतोको अध्यक्षतामा ९ सदस्यीय वडास्तरीय प्रारम्भिक बाल विकास समिति गठन गरिएको छ । सो समितिको सदस्यहरुमा महिला वडासदस्य सावित्री देवी महतो, दलित महिला वडासदस्य कौशिल्या देवी महरा, स्वास्थ्य स्वयमसेविका सुजान देवी महतो, बाल विशेषज्ञ रिना सिंह, स्वास्थ्य चौकीका प्रमुख रामचन्द्र साह, हिमालय युवा क्लवका उपाध्यक्ष विनोद कुमार महतो, बाल क्लवका दिपक कुमार महतोलाई चयन गरिएको छ भने समितिको सदस्य सचिवमा वडासचिव संजिप दहाललाई चयन गरिएको छ ।
वडास्तरीय प्रारम्भिक बाल विकास समिति गठन पछि कार्यक्रमलाई सम्बोधन गर्दै वडाअध्यक्ष समेत रहेको समितिका अध्यक्ष विहारी महतोले प्रारम्भिक बाल विकास कार्यक्रमको संचालन, कार्यान्वयन र प्रभावकारिताका लागि समितिले तदारुकताका साथ काम गर्ने बताउनुभयो ।
सो अवसरमा मिथिला नगरपालिकाका शिक्षा शाखा प्रमुख सीता काफ्ले, वडासदस्य जोगी महतो, हरिकुमार यादव, राष्ट्रिय आधारभूत विद्यालय सुग्जोरका प्राधानाध्यापक अरुण कुमार महतो, हिमालय युवा क्लवका अध्यक्ष शिवराम महतो, नगर बाल संजालको अध्यक्ष दिवेश कुमार महतो लगायतको उपस्थिति रहेको थियो ।
यता वडास्तरमा गठन गरिएको सो समितिले स्थानीय स्तरमा तयार गरिएको प्रारम्भिक बाल विकासको कार्यनीति लागु गर्ने, कार्यक्रम संचालन तथा कार्यान्वयन गर्ने र सहजीकरण गरी तोकिएको मापदण्ड अनुसार कार्यक्रमको कार्यान्वय पक्षको अनुगमन, नियमन र मूल्यांकन लगायतको कार्य गर्नुपर्ने सेतो गुराँस राष्ट्रिय बाल विकास सेवाका जिल्ला संयोजक नितु मिश्रले जानकारी दिनुभयो ।
सेतो गुराँस राष्ट्रिय बाल विकास सेवा र मिथिला नगरपालिकाको संयुक्त स्वामित्वमा धनुषाको मिथिला नगरपालिकाले प्रारम्भिक बाल विकासको कार्यनीति लागु गरेको छ । जसमा गर्भाअवस्था देखि ८ वर्ष सम्मको बालबालिकाको सर्वाङ्गीण विकास र क्षमता अभिवृद्धिका लागि मिथिला नगरपालिकाको ११ वटै वडामा सेतो गुराँसले सहजीकरण गर्दै आएको संस्थाका पालिका संयोजक बबिता खड्काले बताउनुभयो ।
प्रारम्भिक बाल विकासको कार्यनीति अन्तर्गत मिथिला नगरपालिकाका ११ वटा वडामध्ये शुक्रवारसम्म वडा नं. २, ५ र ८ मा गरी तीन वटा वडामा वडास्तरीय प्रारम्भिक बाल विकास समिति गठन गरिएको छ । मिथिला नगरपालिका रहेको २८ वटा सामुदायिक विद्यालयमा जम्मा ४३ वटा बाल विकास शाखा रहेको पालिका संयोजक खड्काले बताउनुभयो ।
