स्वागतम खबर
ढल्केवर, पौष २ ।
धनुषाको मिथिला नगरपालिका २ नक्टाझिजमा शनिवारदेखि वडास्तरीय वृहत सरसफाइ अभियान संचालन गरिएको छ । नक्टाझिजमा रहेको गाउँको मूल सडक किनारको दायाँ र बाँया दुवै साइडको अतिक्रमित ४ फिट जग्गा खाली गर्न र सडक सफा राख्न सूचना सहित अभियान सुरु गरिएको वडा कार्यालयले जनाएको छ ।
वडाका मूल सडकसँगै सबै शाखा सडकहरुमा पनि सडक सरसफाइ गर्न तथा सडकमा गोबर, गोरहा, उखुको सिठ्ठी, घरपालुवा जनावर, टायरगाडा, टयाक्टर, टेलर लगायतका सामग्री नराख्न भन्दै सुचना सहित रैली गरेको छ । सडकमा कुै प्रकारको वस्तु वा सरसमान राखेको भए पौष ५ गतेभित्र हटाएर खाली गर्न सूचनासहित रैली गरिएको वडाअध्यक्ष विहारी महतोले जानकारी दिनुभयो । सरसफाइ र सडक खालीका लागि पटक पटक सूचना जारी गर्दै आएको भएपनि अबको सूचनालाई अटेर गरेर सडक खाली नगरेमा वा सफा नगरेमा पौष ६ गतेदेखि फोहरमैला व्यवस्थापन ऐन तथा अपराध संहिता २०७४ तथा वडास्तरीय खानेपानी,सरसफाइ तथा स्वच्छता समन्वय समितिको निर्णयानुसार पौष ६ गतेदेखि कारवाही गरिने उहाँले बताउनुभयो । सूचनालाई अटेर गरेमा सडक खाली नगरेमा वा सडकमा कुनै मालसमान राखेको पाएमा पौष ६ गतेदेखि एक पटकको लागि रु. एक हजार एक सय रुपैयाँ जरिवाना गरिने समितिका अध्यक्ष समेत रहेका वडाअध्यक्ष महतोले जानकारी दिनुभयो ।
अगामी दिनमा सडक सुधार तथा निर्माण, खानेपानीको पाइपलाई सुधार, ढल तथा नाला व्यवस्थापन लगायतको लागि समेत कार्यहरु गर्नुपर्ने भएकाले सरसफाइ महाअभियानमा सबै वडावासीलाई सहयोगका लागि समितिले आग्रह समेत गरेको छ ।
मिथिला नगरपालिका, वडा कार्यालय तथा वडास्तरीय खानेपानी, सरसफाइ तथा स्वच्छता समन्वय समितिको आयोजना तथा हिमालय युवा क्लवको समन्वयमा नक्टाझिजमा वृहत सरसफाइ अभियान संचालन गरिएको वडासचिव सुदिप दहालले जानकारी दिनुभयो । उहाँले सबै वडाबासीलाई स्वस्फुर्त रुपमा वडाको सरसफाइ अभियानमा सहयोग गर्न र आफ्नो घर अगाडीको फोहर सफा गरी सडक सफा र खाली गरिदिनका लागि अपिल गर्नुभएको छ ।
सरसफाइ अभियान रैलीको कोणसभामा बौल्दै हिमालय युवा क्लवका अध्यक्ष शिवराम महतोले सरसफाइ गर्दा धेरै रोगबाट बँच्न सकिने भएकाले सबैलाई आफ्नै काम र कर्तव्य सम्झेर वडाको सरसफाइ अभियानमा सहभागी भएर नमुना वडा बनाउने कार्यमा सहयोगका लागि आग्रह गर्नुभएको छ । कोणसभामा जसपाका वडा अध्यक्ष रामनाथ महतो, स्वास्थ्यचौकी नक्टाझिजमा प्रमुख रामचन्द्र साह लगायतका अभियानीहरुले आ आफ्नो धारण राख्नुभएको थियो । अभियानमा वडाका युवा क्लव, बाल क्लव, सबै राजनीतिक दलका प्रतिनिधीहरुको सहभागिता रहेको थियो ।
फोहरमैला व्यवस्थापन ऐन २०६८ का अनुसार सार्वजनिक स्थानमा फोहोर फाल्ने वा फोहोर व्यवस्थापनमा अवरोध गर्नेलाई १५ देखि ३ महिना कैद र पाँच सयदेखि एक लाखसम्म जरिवाना वा दुवै सजायँ हुन सक्ने व्यवस्था छ । नेपालको संविधान २०७२ मा समेत खानेपानी, सरसफाइ तथा स्वच्छताको विषयलाई माग ३ अन्तर्गत मौलिक हकको रुपमा राखिएको छ ।
