स्वागतम खबर
जनकपुरधाम, माघ ३ ।
बचतकर्तालाई ठगी गरेको आरोपमा जिल्ला बचत तथा ऋण सहकारी संघ धनुषाका अध्यक्ष ध्रुव यादवलाई प्रहरीले पक्राउ गरेको छ । अध्यक्ष यादवलाई बचतकर्ताबाट संकलित लाखौं रकम ठगी गरेको आरोपमा पक्राउ गरेको प्रहरीले जनाएको छ ।
राष्ट्रिय सहकारी बैंक लिमिटेडको संचालक समितिका सदस्य समेत रहेका यादवलाई प्रहरीले पक्राउ गरी मुद्दा समेत चलाएको छ । यादवलाई सहकारी संस्थाका बचतकर्ताको रकम ठगी गरेको तथा सहकारीमा जम्मा भएको रकम अपचलन गरेको उजुरीका आधारमा पक्राउ गरी अनुसन्धान सुरू गरिएको जिल्ला प्रहरी कार्यालय धनुषाका प्रहरी नायव उपरीक्षक दिपक रायले जानकारी दिनुभयो ।
जिल्ला प्रहरी कार्यालय धनुषाका अनुसार एकजना सहकारीका बचतकर्ताले आफ्नो जग्गा सहकारीमा धितो राखी २५ लाख रुपैयाँ ऋण लिएको र पछि सो रकम फिर्ता गरेपनि अध्यक्ष यादवले लामो समयसम्म उनको जग्गा फुकुवा नगरी लिलामीको अवस्थामा पुग्याएपछि उनले दिएको उजुरीका आधारमा यादवलाई ठगी मुद्दामा पक्राउ गरिएको हो ।
प्रारम्भिक अनुसन्धानमा सहकारीमा आबद्ध बचतकर्ताको जग्गा फुकुवा नगरी यादवले करिब २५ लाख रुपैयाँ आफूसँगै राखेर लामो समयसम्म फिर्ता नगरेका उजुरीका आधारमा पक्राउ गरिएको प्रहरीले जनाएको छ ।
