विनोद महतो
धनुषा, माघ २६ ।
धनुषामा भईरहेको पाँचौ संस्करणको सहाना प्रधान स्मृति राष्ट्रिय महिला हक्की प्रतियोगितामा नेपाल आर्मी र लुम्बिनी प्रदेश फाइनलमा प्रवेश गरेको छ । अब माघ २८ गते हुने प्रतियोगिताको फाइनलमा खेलमा नेपाली आर्मी र लुम्बिनी प्रदेश भिड्ने भएको छ ।
प्रतियोगिता अन्तर्गत विहिवार (आज) दुई वटा सेमिफाइनल खेल भएको छ । नेपाल आर्मी र मधेश प्रदेशबीच भएको सेमिफाइनलको पहिलो खेलमा नेपाल आर्मीले मधेश प्रदेशलाई शुन्यका विरुद्ध ६ गोलले पराजित गर्दै फाइनलमा पुगेको हो ।
यस्तै लुम्बिनी प्रदेश र सुदुरपश्चिम प्रदेशबीच भएको दोस्रो खेलमा लुम्बिनी प्रदेशले सुदुरपश्चिमलाई शुन्यका विरुद्ध एक गोलले हराउँदै फाइनलमा स्थान सुरक्षित गरेको छ ।
प्रतियोगिता अन्तर्गत माघ २७ गते शुक्रवार तेस्रो स्थानका लागि मधेश प्रदेश र सुदुरपश्चिम प्रदेशबीच विहान साढे ९ बजेदेखि खेल हुने प्रतियोगिताका निर्णायक बाबुराम नेपालले जानकारी दिनुभयो ।
धनुषाको मिथिला नगरपालिका २ नक्टाझिजस्थित हिमालय युवा क्लवको खेल मैदानमा माघ २३ गते सोमबारदेखि सो प्रतियोगिता भईरहेको छ ।
प्रतियोगितामा जम्मा १३ वटा खेलमा अहिलेसम्म ११ वटा खेल सम्पन्न भईसकेको छ । प्रतियोगितामा प्रथम हुने टिमलाई रु.७५ हजार, दोस्रो हुनेलाई रु.४० हजार र तेस्रो हुने टिमलाई रु.२५ हजार नगद पुरस्कार र शिल्ड प्रदान गरिने आयोजकले जनाएको छ ।
नेपाल हक्की संघ र मिथिला नगरपालिकाले संयुक्त रुपमा राष्ट्रिय महिला हक्की प्रतियोगिताको आयोजना गरेको छ । राष्ट्रिय महिला हक्की प्रतियोगितामा नेपालको ६ वटा प्रदेश र एक विभागीय टोली (नेपाल आर्मी) गरी सात वटा टिमको सहभागिता रहेको छ ।
