स्वागतम खबर
ढल्केवर, फाल्गुन ८ ।
राष्ट्रिय हात्तीपाईले रोग निवारण कार्यक्रम २०७९ यहि फाल्गुन ११ गतेदेखि देशको १७ वटा जिल्लामा शुरु हुने भएको छ । सो अभियान धनुषाको मिथिला नगरपालिकामा समेत ११ वटै वडामा फाल्गनु ११ गतेदेखि सुरु गर्ने तयारी गरिएको छ । कुनै लक्षण नदेखिएपनि शरीरमा हात्तीपाईल रोगको परजीवि हुन सक्ने भन्दै आम नागरिकलाई औषधी सेवन गर्न गराउन मिथिला नगरपालिकाले फाल्गुन ११ गतेदेखि अभियान संचालन गर्न लागेको हो ।
अभियानको क्रममा मिथिला नगरपालिका वडा नं. २ को साविक वडाहरुमा समुदायस्तरीय गोष्ठी संचालन गरी हात्तीपाईले रोग विरुद्धको औषधी खुवाउने विषयमा जागरुक बनाउने कार्य गरिरहेको नक्टाझिज हेल्थ पोष्टका प्रमुख रामचन्द्र साहले जानकारी दिनुभयो । मिथिला नगरपालिका २ नक्टाझिजको साविकका ६ वटै वडामा तालिका बनाएर हात्तीपाईले रोग विरुद्ध आमऔषधी सेवन अभियान कार्यक्रम संचालन गर्ने तयारी गरिरहेको उहाँले बताउनुभयो ।
तालिका अनुसार फागुन ११, १२ र १३ गते साविकको वडा नं. १, १४ गते वडा नं. २, १५ र १६ गते वडा नं. ३, १७ र १८ गते वडा नं. ४, १९ र २० गते वडा नं. ५ र २१ र २२ गते वडा नं. ६ मा हात्तीपाईले रोग विरुद्ध आमऔषधी सेवन गराउने कार्यक्रम रहेको जनाएको छ । साहका अनुसार हात्तीपाईले रोग विरुद्ध चलाउने औषधीहरु अत्यन्त प्रभावकारी र सुरक्षित रहेको बताउनुभयो । २ वर्ष भन्दामुनिका बच्चा, गर्भवती महिला, सुत्केरी भएको एक हप्ताभित्र र अशक्त भई बेडमा रहेका बाहेक सबै आम नागरिकलाई हात्तीपाईले रोग विरुद्धका औषधी खानैपर्ने उहाँको भनाई थियो ।
यस पटक हात्तीपाईले रोग निवारणका लागि अल्वेण्डाजोल, आइभरमेक्टिन र डाईथालकार्वामाइजिन गरी ३ प्रकारको औषधी खुवाउने कार्यक्रम रहेको छ । यसअघि दुई थरिका औषधी खुवाउँदै आएकोमा यसपालीदेखि आइभरमेक्टिन भन्ने औषधी थपेर खुवाउन लागिएको हो । यी तीन थरिका औषधीले हात्तीपाईले रोग लागिसकेकाहरुको अझ धेरै प्रभावकारी रुपमा उपचार हुनुका साथै रोग लाग्नबाट पनि बचाउने चिकित्सकहरुको भनाई छ ।
आम औषधी सेवन अभियान सम्बन्धी सोमवार साविकको वडा नं. १ स्थित पर्तीटोलको राष्ट्रिय आधारभूत विद्यालयमा आयोजित समुदायस्तरीय गोष्ठीमा औषधी सेवन गरी हात्तीपाईले रोग निवारण अभियानमा सहयोग गर्न उहाँले वडासदस्य जोगी महतोले टोलवासीलाई आग्रह गर्नुभयो ।
रोग लागि सकेपछि पूर्ण रुपमा निको हुन नसक्ने भएकाले समयमै औषधी खाएमा शरीरमा हात्तीपाईलेको परजीवि नष्ट हुने र रोग नलाग्ने भएकाले आम रुपमा औषधी सेवन गरी हात्तीपाईले रोग निवारण अभियानमा सहयोग सहभागीहरुले प्रतिबद्धता जनाएका छन् ।
विगतका अभियानहरुमा औषधी लिने र पछि खान्छु भन्दै नखाने तथा फालिदिने भएपछि यस पटक स्वास्थ्यकर्मीका टोली आफ्नै अगाडी औषधी खुवाउने भएको तयारी गरिएको छ ।
सन २०३० सम्ममा नेपालबाट हात्तीपाईले रोग निवारण गर्ने लक्ष्य सहित सरकारले हात्तीपाईले रोग विरुद्ध औषधी सेवन अभियान चलाउँदै आएको छ । हात्तीपाईले रोग Wuchereria ba ncrofti(९०%), Brugia malayi and B.timori नामको परजीविहरुको कारणले हुने शरीरको संक्रमण हो । नेपालमा एनोफेल्स मान्सोनल्स र एडेस नामको लामखुट्टेबाट यो रोगको परजीवि सर्ने गरेको छ ।
