स्वागतम खबर
धनुषा, फागुन २३ ।
मिथिलाकै महाकुम्भ मानिएको प्रसिद्ध १५ दिने मिथिला माध्यमिकी परिक्रमा आज सम्पन्न भएको छ । आज बिहानैदेखि जनकपुरधामको अन्तरगृह परिक्रमा गरी १५ दिने पद यात्राको मिथिला माध्यमिकी परिक्रमा सम्पन्न भएको हो । फागु पूर्णिमाको दिन जनकपुरधामको अन्तरगृह परिक्रमा गरी सम्पन्न हुने गर्दछ ।
मिथिला माध्यमिकी तथा अन्तगृह परिक्रममा यस वर्ष नेपाल भारतका लाखौं साधुसन्त तथा श्रद्धालु भक्तजनहरुको सहभागिता रहेको थियो । १५ दिने परिक्रममा सहभागी हुन नसकेकाहरु तथा अन्य श्रद्धालुहरु समेत जनकपुरधामको अन्तरगृह परिक्रममा सहभागी हुने गर्छन् ।
प्राचिन मिथिलाको राजधानी जनकपुरधामको अग्नि कुण्डबाट माता जानकी र मिथिला विहारी नगरपालिकाको कचुरी मठबाट भागवान रामको डोला लिएर फागुन औसींका दिनदेखि भगवानको भजन, किर्तन झाँकी सहित यो यात्राको शुभारम्भ गरिन्छ । परिक्रमामा नेपालको धार्मिक ऐतिहासिक ठाउँहरुको १०७ किलोमिटर र भारतको २६ किलोमिटर गरी जम्मा १३३ किलोमिटर भू–भागको पैदल यात्रा गर्ने गरिन्छ । पदयात्राको क्रममा पदमार्गमा रहेको १५ वटै विश्राम स्थलमा परिक्रमा यात्रीहरुको सेवा सुविधाका लागि वृहत्तर जनकपुर क्षेत्र विकास परिषदले प्रत्येक विश्राम स्थलमा घुम्ती शौचालय, बिजुली, खानेपानी, स्वास्थ्य शिविर लगायतका व्यवस्था गर्दै आएको अध्यक्ष शीतल साहले बताउनुभयो ।
परिक्रमा गर्दा विभिन्न प्रकारको रोग, कलेश, दुःख, कष्टबाट मुक्ति मिल्ने एवं मनोवाञ्छित फल प्राप्त हुने धार्मिक जनविश्वास रहि आएको छ । परिक्रमा सकिएपछि त्यसको भोलीपल्ट मिथिलाञ्चल क्षेत्रमा होली खेल्ने परम्परा रहेको परिषदका अध्यक्ष साहले जानकारी दिनुभयो ।
