स्वागतम खबर
ढल्केवर, बैशाख १४ ।
धनुषाको मिथिला नगरपालिकामा अभिभावक शिक्षा सम्बन्धी सात दिने आधारभूत तालिम विहिवारदेखि सुरु भएको छ । अभिभावक शिक्षा कार्यक्रमको उद्देश्य, महत्व र प्रारम्भिक बालकाविकाको अवधारणा तथा अभिभावक शिक्षा कक्षा संचालनका लागि सहजकर्ता तयार गर्ने उद्देश्यका साथ सो तालिम सुरु गरिएको छ ।
मिथिला नगरपालिकाका प्रमुख प्रशासकीय अधिकृत बसन्त न्यौपानेले सो तालिमको उद्घाटन गर्दै सहभागीहरुलाई अभिभावक शिक्षा र प्रारम्भिक बाल विकास सम्बन्धी तालिमबबाट सिकेको सीप र ज्ञानलाई सहि ढंगले सहि समयमा उपयोग गर्न आग्रह गर्नुभयो । उहाँले बालबालिकाको शिक्षाको प्रारम्भ घरबाटै हुनेभएकाले दोस्रो पाठशालाको रुपमा रहेको विद्यालयलाई बालमैत्री र गुणस्तरिय शिक्षामा जोड दिनुपर्ने धारणा राख्नुभयो । अभिभावकहरुले समेत बालबालिकाको पठन पाठनमा मैत्रीपूर्ण व्यवहार गर्नुपर्ने र विद्यालयमा बाल शिक्षकको शिक्षण व्यवहार पनि मैत्रीपूर्ण हुनुपर्ने, उनीहरुको रुची अनुसार शिक्षण गर्नुपर्ने कार्यमा विशेष ध्यान दिनुपर्ने उहाँको भनाई थियो ।
यता तालिम उद्घाटनको सत्रमा मन्तव्य राख्दै मिथिला नगरपालिकाका वडा नं. ७ का वडाअध्यक्ष रामबहादुर स्यांगदनले तालिमबाट सिकेका बाल शिक्षण सीप, कला, तौरतरिकालाई मैत्रीपूर्ण रुपमा बालबालिकाको शिक्षण कार्यमा उपयोग गर्न सहभागीहरुलाई आग्रह गर्नुभयो ।
तालिमको उद्घाटन सत्रमा मिथिला नगरपालिकाका शिक्षा शाखा प्रमुख सीता काफ्ले, मिथिला नगर पत्रकार संजालका अध्यक्ष विनोद कुमार महतो लगायतले तालिमको सफलताका लागि मन्तव्य राख्नु भएको थियो ।
अभिभावक शिक्षा सम्बन्धी सात दिने आधारभूत तालिममा मिथिला नगरपालिकाको ११ वटै वडाबाट बाल शिक्षिका, स्वास्थ्य स्वयम सेविका र समाजिक परिचालिका गरी तीन/तीन जनालाई सहभागि गराइएको छ । तालिममा सेतो गुराँस बालविकास सेवा महोत्तरीका जिल्ला संयोजक एवं प्रशिक्षक नितु मिश्र र प्रशिक्षक रेजिना स्यांगदनले सहजिकरण गर्दै आउनु भएको छ ।
मिथिला नगरपालिका ढल्केवरको आयोजना तथा युनिसेफको सहयोग एवं सेतो गुराँस राष्ट्रिय बाल विकास सेवा, सेतो गुराँस राष्ट्रिय बाल विकास सेवा महोत्तरीको प्राविधिक सहयोगमा सो तालिम संचालन भएको छ ।
तालिममा अभिभावक शिक्षाको विभिन्न ११ वटा उद्देश्यहरुलाई लक्षित गर्दै सहभागीहरुलाई सात दिनसम्म अभ्यास सहित प्रशिक्षण दिने तालिका रहेको प्रशिक्षक मिश्रले बताउनुभयो । उहाँको अनुसार तालिममा उद्देश्य, प्रारम्भिक बाल्यावस्थाको महत्व, आवश्यकता, बालबालिकालाई आवश्यक पोषणयुक्त खाना बनाउने तथा खुवाउने ज्ञान, सीप अभिवृद्धि गर्ने, स्वास्थ्य, स्याहार र सरसफाइ सम्बन्धी सीप अभिवृद्धि गर्ने उनीहरुको उमेर अनुसार उत्प्रेरणा तथा अन्तरक्रिया गर्ने, बाल केन्द्रीत क्रियाकलाप, खेल र खेलौना सहितको वातावरण उपलब्ध गराउने, सिकाइमा सहयोग, प्रारम्भिक पढाइ लेखाइमा सहयोग गर्ने, विना भेदभाव, बाँच्न, सिक्न, सहभागी हुन र संरक्षण गर्ने, बालबालिकालाई विद्यालयमा ल्याउन तत्परताका लागि पूर्व तयारी गराउन सहयोग गर्ने, हेला, हिंसा, दुव्र्यवहार र सजायबाट संरक्षण गर्नका लागि सीपको विकास गराउन तालिम उपयोगी हुने अपेक्षा गरिएको छ ।
धनुषाको मिथिला नगरपालिकाले प्रारम्भिक बाल विकासको कार्यनीति लागु गरेको छ । जसमा गर्भाअवस्था देखि ८ वर्षसम्मको बालबालिकाको सर्वाङ्गीण विकास र क्षमता अभिवृद्धिका लागि नगरपालिकाको ११ वटै वडामा वडास्तरीय प्रारम्भिक बाल विकास समिति गठन गरिएको छ । यस्तै पालिकामा रहेको २८ वटा सामुदायिक विद्यालयमा जम्मा ४३ वटा बाल विकास शाखा मार्फत प्रारम्भिक बाल विकास र अभिभावक शिक्षा सम्बन्धी कार्यक्रम संचालन गर्दै पालिका बाल विकास संयोजक बविता खड्काले जानकारी दिनुभयो । अगामी आर्थिक वर्ष २०८०/०८१ मा ६६ वटा समुदायमा यो कार्यक्रम चलाउने मिथिला नगरपालिकाले जनाएको छ ।
‘‘प्रारम्भिक बालविकासमा लगानी, दिगो राष्ट्र विकासको थालनी ’’ मूल नाराका साथ नेपालमा चलिरहेको प्रारम्भिक बालशिक्षा र विकासको सवलीकरणका लागि प्रारम्भिक सिकाइ तथा विकास मापदण्ड कार्यान्वय परियोजना अन्तर्गत सो तालिम दिँदैछ ।
परियोजना अन्तर्गत धनुषाको मिथिला नगरपालिका र धनौजी गाउँपालिकामा प्रारम्भिक बाल विकासका लागि अभिभावक सचेतीकरणका लागि ५० जना बाल शिक्षक, महिला स्वास्थ्य स्वयम सेविका र समाजिक परिचालिकालाई ७ दिने आधारभूत तालिम दिएर सहजकर्ता तयार गर्न लागेको छ ।
