क्षीरेश्वरनाथको ११औं नगरसभामा ६८ करोड ९२ लाखको अनुमानित बजेट प्रस्तुत

स्वागतम खबर
महेन्द्रनगर, असार १० ।
धनुषाको क्षीरेश्वरनाथ नगरपालिकाले अगामी आर्थिक वर्ष २०८०/०८१ का लागि नीति तथा कार्यक्रम र अनुमानित बजेट सार्वजनिक गरेको छ । नगरपालिकाले असार १० गते आइतवारको दिन महेन्द्रनगरमा आयोजना गरेको ११औं नगरसभामा नीति तथा कार्यक्रम र अनुमानित बजेट सार्वजनिक गरेको छ ।
क्षीरेश्वरनाथ नगरपालिकाका मेयर सुखदेव यादवले अगामी आर्थिक वर्ष २०८०/०८१ का लागि ६८ करोड ९२ लाख ९९ हजारको अनुमानित बजेट सार्वजनिक गर्नुभएको छ ।
‘स्वास्थ्य, शिक्षा र आर्थिक विकास, सामाजिक न्याय क्षीरेश्वरनाथको निकास’ भन्ने मुल नारालाई आत्मसाथ गर्दै क्षीरेश्वरनाथ नगरपालिकाको एघारौं नगरसभामा नगर प्रमुख यादवले नीति तथा कार्यक्रम प्रस्तुत गर्दै रु. ६८ करोड ९२ लाख ९९ हजारको अनुमानित बजेट सार्वजनिक गर्नुभएको छ ।

नगरपालिकाको प्रमुख यादवको अध्यक्षतामा भएको एघारौं नगरसभामा नगरपालिकाका उपमेयर रचना माथेमा, विभिन पार्टीका नगर प्रमुख, प्रमुख प्रशासकीय अधिकृत, सबै वडाका वडाअध्यक्ष, कार्यपालिका सदस्य, वडा सदस्य, लगायत नगरवासी र कर्मचारीहरुको उपस्थिति रहेको थियो । सो नगरसभामा पालिकाका प्रमुख प्रशासकीय अधिकृत शिवेन्द्र कुमार मण्डलले स्वागत मन्तव्य राख्नुभएको थियो ।
नगरपालिकाले नेपाल सरकारबाट प्राप्त वित्तिय समानिकरण अनुदान रु. १२ करोड ५६ लाख, नेपाल सरकार सर्शत अनुदान रु. १६ करोड ८९ लाख, नेपाल सरकार विशेष अनुदान १ करोड ५० लाख, समपुरक अनुदान ८० लाख, राजश्व बाँडफाँड ९ करोड ७४ लाख ७७ हजार, प्रदेश सरकार वित्तिय समानिकरण रु. ९२ लाख ७२ हजार, सर्शत अनुदान १ करोड, समपुरक अनुदान २० लाख, विशेष अनुदान ३० लाख, राजश्व बाँडफाँड ७० लाख, आन्तरिक आय रु. ३ करोड १० लाख गत मौज्दान ७ करोड, सडक बोर्ड नेपालको रु. २५ लाख, युनिसेफको कार्यक्रम रु. १० लाख, समाजिक सुरक्षा ११ करोड ३२ लाख ५० हजार, प्रदेश तथा स्थानीय शासन सहयोग कार्यक्रम रु. ५ लाख, लागत सहभागिता १ करोड ५० लाख र मालपोत कार्यालयबाट रु. ६८ लाख गरी जम्मा ६८ करोड ९२ लाख ९९ हजारको आय अनुमान नगरसभामा पेश गरेको छ ।
नगरपालिका अगामी वर्षमा समेत चाल किल्ला, घरबाटो, नागरिकताको सिफारिस, जन्मदर्ता, विवाहदर्ता, मृत्युदर्ता बसाई सराईको सिफारिस निःशूल्क गर्ने नीति तथा कार्यक्रममा उल्लेख छ । यस्तै नगरपालिकाले कृषकसँग मेयर कार्यक्रम संचालन गर्ने योजना ल्याएको छ
यसअघि नगरपालिकाले चालु आर्थिक वर्ष २०७९/०८० का लागि छुट्याइएको ७३ करोड ९ लाख १७ हजारमध्ये हालसम्म चालुतर्फ ४६ प्रतिशत र पुजिगततर्फ १६ प्रतिशत रकम खर्च गरेको जनाएको छ । नगरपालिकाले चालु आर्थिक वर्षमा ONM गरेको, जग्गा वर्गिकरण, कभर्ड हल निर्माण, कोल्ड स्टोरका लागि बजेट व्यवस्थापन, सखुवा पोखरी सम्बन्धी कार्यक्रम सुरुवात, आमा सुरक्षा कार्यक्रम वडाको भौतिक पूर्वाधार विकास (वडा नं. १ देखि १० सम्म) का महत्वपूर्ण कार्य गरेको जनाएको छ ।