स्वागतम खबर
महेन्द्रनगर, असार १० ।
धनुषाको क्षीरेश्वरनाथ नगरपालिका ३ करमाही टोलस्थित मुसहर समुदायका व्यक्तिहरुलाई जीविकोपार्जनमा सहजताका लागि व्यवसायमुलक सामग्री निःशुल्क वितरण गरिएको छ । क्षीरेश्वरनाथ नगरपालिकाको समन्वयमा इन इमल हेल्वेटास नेपालको सहयोगमा मानव कल्याण समाज धनुषाले मुहसर समुदायका सात जना विपन्नलाई व्यवसायिक विउ पुँजी हस्तान्तरण कार्यक्रम अन्तर्गत सो सामग्री वितरण गरेको छ ।
स्थानीय दुई नगिनादेवी सदा र शिवसतीदेवी सदालाई किराना पसल संचालनका लागि प्रतिजना २५ हजार बराबरको किराना सामग्री, दुई जना महिला पवनदेवी सदा र निर्मलादेवी सदालाई प्रतिजना ३९ हजार बराबरको तरकारी बेच्ने ठेलागाडी र विभिन्न तरकारी तथा सागसब्जी, रामु सदालाई ३० हजार बराबरको खानेपानी तथा पलम्बरका सामग्री र दुशुभनारायण सदा र श्याम सदालाई प्रतिजना ३५ हजारका दरले जेसिवी ड्राइभरिङ्गको स्कील प्रदान गरेको माजव कल्याण समाज धनुषाका कार्यक्रम संयोजक प्रमोद कुमार यादवले जानकारी दिनुभयो ।
विपन्नलाई व्यवसायिक विउ पुँजी हस्तान्तरण कार्यक्रमका प्रमुख अतिथि क्षीरेश्वरनाथ नगरपालिकाका नगर प्रमुख सुखदेव यादवले स्थानीयलाई सो सामग्री हस्तान्तरण गर्दै आफु विपन्न समुदायका लागि सदैग सहयोग गर्न तयार रहेको बताउनुभयो । आफु पनि गरिव परिवारबाट आएको हुँदा गरिव र गरिवीको पिडा गहिरो रुपमा महसुस गरेको हुँदा मुसहर समुदायको उत्थानका लागि सक्दो सहयोग गर्ने प्रतिबद्धता पनि जनाउनुभयो ।
यता व्यवसायमूलक सामग्री पाएपछि खुशी हुँदै स्थानीय शिवसतीदेवी सदाले यसले आफुहरुको दैनिकी र जीवकिोपार्जनमा सहयोग पुग्ने र आम्दानीको बाटो पनि भएको बताउनुभयो ।
बगरखेती कार्यक्रमबाट योजनाको सुरुवात गरेका मानव कल्याण समाज धनुषाले स्थापनाको कम समयमै विपन्न समुदायको उत्थान र जिविकोपार्जनमा सहयोग गर्दै अगाडी बढिरहेको छ । संस्थाले हाल क्षीरेश्वरनाथ नगरपालिका, धनुषाधाम नगरपालिका र लक्ष्मीनियाँ गाउँपालिकामा पर्ने नदी किनारको पर्ती र ऐलानी जग्गामा स्थानीय विपन्न समुदायका व्यक्तिहरुको जीविकोपार्जन सुधार ल्याउन र साना व्यवसाय तर्फ उन्मुख गराई आय आर्जनमा टेवा पुग्याउने उद्देश्यले पालिका र हेल्वेटासको सहयोगमा कार्य गर्दै आएको कार्यक्रम संयोजक यादवले बताउनुभयो ।
सो कार्यक्रममा क्षीरेश्वरनाथ नगरपालिका वडा नं. १ का अध्यक्ष मकेश्वर यादव, वडा नं. ३ का वडासदस्य अहमद हुसैन, लगायत स्थानीयहरुको उपस्थिति रहेको थियो ।
संस्थाले अगामी दिनमा क्षीरेश्वरनाथ नगरपालिका ३ करमाही टोलमै बसोबास रहेका मुसहर समुदायका ६५ घरपरिवारलाई जीविकोपार्जनका लागि प्रति परिवार भालेपाथी गरी दुई/दुई थान बंगुर वितरण गर्ने, ४ जनालाई व्यवसायिक तरकारी खेतीका लागि सहयोग गर्ने, ४ जना महिलालाई सिलाई कटाई तालिम प्रदान गर्ने, ४ जनालाई फ्रेस हाउस निर्माण र संचालनमा सहयोग गर्ने, १० जनालाई कुक तालिम दिने, र ५ जनालाई माछापालनका लागि सहयोग र तालिम उपलब्ध गराउने योजना रहेको संयोजक यादवले जानकारी दिनुभयो ।
