स्वागतम खबर
महेन्द्रनगर, कार्तिक १६ ।
धनुषाको क्षीरेश्वरनाथ नगरपालिका वडा नं. ९ दिगम्बरपुरस्थित साना किसान कृषि सहकारी संस्था लि.कोे २१ औं वार्षिक साधारणसभा विहिवार भव्यताका साथ सम्पन्न भएको छ । साना किसान कृषि सहकारी संस्था लि.दिगम्वरपुरका अध्यक्ष लक्ष्मी कुमार यादवको अध्यक्षता तथा क्षीरेश्वरनाथ नगरपालिकाका नगर प्रमुख सुखदेव यादवको प्रमुख आतिथ्यमा साधारणसभा मनाइएको हो ।
संस्थाको नजिकै रहेको स्कुलका प्राङ्गणमा भएको साधारणसभा कार्यक्रममा संस्थाको वार्षिक आयव्यय र प्रगति विवरण र अगामी कार्ययोजना प्रस्तुत गरिएको छ । साधारणसभामा संस्थाको अगामी योजना प्रतिवेदन संचालक समितिका अध्यक्ष लक्ष्मी कुमार यादव, लेखा प्रतिवेदन लेखा समिति संयोजक ईन्द्रा कुमारी महतो र आयव्यय प्रतिवेदन संस्थाका प्रबन्धक चन्द्र किशोर सिंह (सिके) ले प्रस्तुत गरेका छन् ।
प्रस्तुत प्रतिवेदन अनुसार संस्थाले यस चालु आर्थिक वर्ष २०८०/०८१ को असोज मसान्तसम्ममा ८९ लाख ३ हजार ३५ रुपैयाँ आम्दानी गरेको छ भने ४६ लाख १६ हजार ३ सय ८६ रुपैयाँ नाफा आर्जन गरेको छ । यस्तै संस्थाको ऋण असुली दर हाल ७७ प्रतिशत रहेको छ भने गत असारसम्ममा ९२ प्रतिशत रहेको थियो ।
संस्थाले चालु आर्थिक वर्षको असोजसम्ममा ५ करोड २० लाख ८१ हजार लगानी गरेको छ भने गत आर्थिक वर्ष २०७९/०८० मा २५ करोड ६४ लाख १६ हजार लगानी गरेको थियो । यस्तै चालु आर्थिक वर्षको असोजसम्ममा ५ करोड १६ लाख ८५ हजार ३ सय १० रुपैयाँ असुली गरेको छ भने गत आर्थिक वर्षमा २२ करोड ८१ लाख ६७ हजार ५ सय १ रुपैयाँ असुली गरेको थियो ।
संस्थाले गत वर्ष ४ करोड ३९ लाख ३५ हजार ३ सय ९४ जम्मा आम्दानी गरेको थियो भने ३ करोड ८७ लाख २१ हजार ६ सय १३ रुपैयाँ खर्च गरेको थियो ।
यस्तै संस्थाले संचालन गरेको एम्बुलेन्स सेवाबाट चालुक आर्थिक वर्षको असोजसम्ममा १ लाख १४ हजार ६ सय रुपैयाँ आम्दानी गरेको छ भने गत आवमा ५ लाख ४९ हजार रुपैयाँ आम्दानी गरेको थियो । संस्थाको बैंक ऋण भार ४७ प्रतिशत रहेको छ ।
संस्थामा हाल ५ सय २७ वटा समूह रहेको छ भने १५ सय ९९ महिला र ७ सय ४६ पुरुष गरी जम्मा २ हजार ३ सय ४६ जना सदस्य रहेको छ । हाल संस्थामा महिला सदस्यको संख्या बढी रहेको छ । संस्थामा महिला समूहको संख्या ४ सय ३३ वटा रहेको छ भने पुरुष समूहको संख्या ९४ वटा रहेको छ । हाल संस्थाको शेयर रकम २ करोड ७३ लाख ८ हजार ६ सय रुपैयाँ रहेको छ ।
साधारणसभामा संस्थाको संचालक समितिका पदाधिकारी, शेयरधनी, बचतकर्ता लगायत हजारौं स्थानीयहरुको उपस्थिति रहेको थियो । सो अवसरमा विभिन्न व्यक्तित्वहरुलाई दोसल्ला ओढाई सम्मान समेत गरिएको थियो ।
यसैबीच साना किसान कृषि सहकारी संस्था लि. दिगम्वरपुरको २१औं वार्षिक साधारणसभामा नियमित बचत बुझाउने, ब्याज बुझाउने दर्जनभन्दा बढी सदस्यलाई कुकर प्रदान गर्दै सम्मान गरिएको संस्थाले जनाएको छ ।
साधारणसभाको उपस्थितिलाई संचालक समितिका उपाध्यक्षमा राजिव यादवले स्वागत मन्तव्यले स्वागत गर्नुभएको थियो । कार्यक्रममा सांस्कृतिक नाट्य संस्था रंगदर्पण जनकपुरले आफ्नो बेजोड सांस्कृतिक गीतसंगितले सहभागीलाई झुमाएको थियो ।
यसैबीचसाना किसान कृषि सहकारी संस्था लि. दिगम्बरपुरको अत्याधुनिक सुविधासम्पन्न नयाँ कार्यालय छिट्टै संचालन आउन लागेको जनाएको छ । संस्थाका अध्यक्ष यादवले दिएको जानकारी अनुसार कार्यालयको सेवासुविधा र व्यवस्थापनलाई व्यवस्थित, छिटोछरितो र सहज बनाउन अत्याधुनिक सुविधासम्पन्न बनाउने कार्य अन्तिम चरणमा रहेको र छिट्टै उद्घाटन गरी संचालन गर्ने तयारी छ ।
साना किसान कृषि सहकारी संस्था लि. दिगम्वरपुरको बन्दै गरेको नयाँ अत्याधुनिक कार्यालय : तस्वीर/ विनोद महतो
