स्वागतम खबर
जनकपुरधाम, माघ २० ।
जनकपुरधाममा भएकाे मधेश प्रदेश सभामुख कप २०८० को उपाधि धनुषा टिमले जितेकाे छ । मधेश प्रदेशसभाको छैटौँ स्थापना दिवसको असरमा जनकपुरधाममा शनिबार सम्पन्न सभामुख कप २०८० को उपाधिमाथि सिरहा जिल्ला टिमलाई ५ विकेटले हराउँदै धनुषा टिमले कब्जा जमाएकाे हाे ।
धनुषा तथा सिरहाका बीचमा भएको फाइनल खेलमा पहिलो व्याटिङ्ग गरेकाे सिरहा जिल्लाले ४० ओभर खेल्दै ९ विकेटको क्षतिमा १ सय ३४ रन बनाएकाे थियाे । प्रतिउत्तरमा धनुषा जिल्लाले ३४.२ ओभर खेल्दै ५ विकेटको क्षतिमा १ सय ३५ रन बनाएर जित निकालेकाे छ । सभामुख कपको उपाधि जित्ने धनुषा जिल्लाले जितसँगै ट्रफी, पदक, प्रमाणपत्र तथा १ लाख ५१ हजार नगद पुरस्कार प्राप्त गरेको छ । यस्तै सभामुख क्रिकेट कपकाे उपविजेता बनेक सिरहा जिल्ला क्रिकेट टिमले ट्रफी, पदक, प्रमाणपत्रसहित १ लाख १ हजार नगद पुरस्कार पाएकाे छ ।
मधेश प्रदेशका प्रदेशसभा सचिवालयको आयोजना तथा जिल्ला क्रिकेट संघ धनुषाको संयोजनमा भएको सभामुख कप २०८० का विजेता टिमलाई मा विजेता बनेका धनुषा क्रिकेट टिमलाई प्रमुख अतिथि प्रदेश प्रमुख हरिशंकर मिश्र तथा सभामुख रामचन्द्र मण्डलले शिल्ड, कप तथा नगद प्रदान गर्नुभएको थियो ।
यता प्रतियोगितामा उपविजेता बनेका सिरहा जिल्लाका क्रिकेट टिमलाई उपसभामुख वविता राउत ईसर, प्रदेश सभाको छैटौँ स्थापना दिवस मूल समारोह समितिका संयोजक कञ्चन विच्छासहितका प्रदेश सभाका सदस्यहरुकाे हातबाट नगद पुरस्कार, शिल्ड र प्रमाणपत्र प्रदान गरिएकाे थियो ।
फाइनल खेलमा धनुषा क्रिकेट टिमकाे तर्फबाट खेलाडी रुपेश यादवलाई म्यान अफ दि म्याचकाे उपाधी प्रदान गरिएकाे छ । यस्तै धनुषाकै अलि अकबर अनसारी बेस्ट ब्याट्सम्यान, विक्रान्त यादव बेस्ट बलर घाेषित भएका छन् भने म्यान अफ दि सिरिज रुपेश यादवलाई प्रदान गरिएकाे छ ।
सभामुख कपमा मधेश प्रदेशका ८ जिल्लाका क्रिकेट टिमको सहभागिता रहेको थियो ।
