स्वागतम खबर
ढल्केवर, चैत २ ।
धनुषाको मिथिला नगरपालिकामा अपाङ्गता भएका व्यक्तिहरुको अधिकार सम्बन्धी एकदिने अभिमुखीकरण कार्यक्रम गरिएको छ । नगरपालिकाका जनप्रतिनिधी, कर्मचारी र नगरस्तरीय अपाङ्गता समन्वय समितिका पदाधिकारीहरुको लागि सो अभिमुखीकरण गरिएको जनाइएको छ ।
अभिमुखीकरणमा अपाङ्गता भएको व्यक्तिले पाउनुपर्ने सवैंधानिक हक अधिकार, सेवा सुविधा, ऐन कानुन, स्थानीय सरकारको जिम्मेवारी लगायतको विषयमा सहभागीहरुलाई जानकारी गराउँदै छलफल भएको बताइएको छ । अपाङ्गता भएको व्यक्तिको अधिकार सम्बन्धी अपाङ्गता समन्वय समितिले गर्नुपर्ने काम, कर्तव्य लगायतको विषयमा समेत प्रस्तुतीकरण गरिएको छ ।
राष्ट्रिय अपाङ्ग महासंघ नेपाल मधेश प्रदेशको आयोजना तथा स्थानीय सरकार सबलीकरण कार्यक्रम अन्तर्गत अष्ट्रेलियन एड एवं द एशिया फाउण्डेशको सहयोग र मिथिला नगरपालिकाको समन्वयमा भएको सो अभिमुखीकरणमा नगर पालिकाले अपाङ्गता सम्बन्धी स्थानीय कार्यविधि बनाएर कार्यान्वयन गर्नुपर्ने सहभागीहरुले बताएका थिए ।
अपाङ्गताको अधिकार सम्बन्धी कार्य विधि बनाएर कार्यान्वयनका लागि नगरपालिकामा सबैले सामुहिक पहल गर्नु राष्ट्रिय अपाङ्ग महासंघ नेपालका राष्ट्रिय वरिष्ठ उपाध्यक्ष राम बहादुर कार्कीले आग्रह गर्नुभयो । अपाङगता पूर्णतया सामाजिक सवाल हो, यो विभेद, अवरोध, सामाजिक भेदभाव र असमान व्यवहारबाट सृजित अवस्था रहेकाले अपाङ्गता समावेशी विकास अधिकारका लागि स्थानीय सरकारलाई अग्रसरता लिनुपर्ने उहाँले बताउनुभयो ।
राष्ट्रिय अपाङ्ग महासंघका अनुसार अपाङ्गता भएको व्यक्तिहरुले अझै पनि तीन तहकै सरकारबाट अपेक्षाकृत अधिकार र सेवा सुविधा पाउन सकेका छैनन् ।
जनताको सबैभन्दा नजिक मानिएका स्थानीय सरकारले पनि अपाङ्गता भएको व्यक्तिहरुका लागि ऐन कानुनमा उल्लेख भएका अधिकार र सेवा सुविधामा सहजता दिन सकेको छैन् भने सेवा सुविधा लिन सहज पहुँचका लागि अपाङ्गतामैत्री भौतिक संरचनाको समेत अभाव रहेको उनीहरुको गुनासो छ ।
कार्यक्रममा मिथिला नगरपालिकाका उप मेयर तथा अपाङ्गता समन्वय समितिका संयोजक सुनितासिंह बुढाथोकी, समितिका सदस्य लालगढ कुष्ट रोग अस्पतालका निर्देशक डा. कृष्ण लामा, सदस्य तथा ईलाका प्रहरी कार्यालय ढल्केवरका प्रहरी निरिक्षक राजकिशोर साह, महिला बालबालिका तथा ज्येष्ठ नागरिक शाखा प्रमुख मिलनदेवी श्रीवास्तव, शिक्षा शाखाका निमित्त प्रमुख रामप्रसाद खरेल, द एसिया फाउण्डेसनका मञ्जु विश्वकर्मा, राष्ट्रिय अपाङ्ग महासंघ नेपाल मधेश प्रदेशका प्रमुख प्रकाश नेपाली, मिथिला नगर पत्रकार संजालका अध्यक्ष विनोद कुमार महतो, अपाङ्गता पैरवी समूहका दिपिका लामा, सारेछे मगर, जयप्रकाश ठाकुर, विश्वेश्वर साह लगायतको उपस्थिति रहेको अपाङगता पैरवी समूहका फोकल पर्सन उपेन्द्र राउतले जानकारी दिनुभयो ।
राष्ट्रिय जनगणना २०७८ को तथ्यांक अनुसार मिथिला नगरपालिकामा ५ सय १४ जना पुरुष र ४ सय ८ जना महिला अपाङगता भएका व्यक्ति छन् । एक अध्ययनका अनुसार अपाङगता हुने कारणहरुमा ५३ दशमलव ६ प्रतिशत रोगबाट, २८ दशमलव ९ प्रतिशत जन्मबाट र १७ दशमलव ६ प्रतिशत दुर्घटना रहेको छ ।
