स्वागतम खबर
ढल्केवर, बैशाख १२ ।
धनुषाको मिथिला नगरपालिकामा “प्रारम्भिक बालविकासमा लगानी, दिगो राष्ट्र विकासको थालनी” मूल नाराका साथ संचालित नेपालमा प्रारम्भिक बालशिक्षा र विकासको सबलीकरणका लागि प्रारम्भिक सिकाइ तथा विकास मापदण्ड कार्यान्वयन परियोजनाको समीक्षा तथा सामाजिक लेखापरिक्षण कार्याशाला बुधवार सम्पन्न भएको छ । स्थानीय तहमा एकीकृत प्रारम्भिक बालविकासका लागि संचालित सो परियोजनाको समीक्षा तथा सामाजिक लेखापरिक्षण कार्याशाला सम्पन्न भएकाे छ ।
मिथिला नगरपालिकाका प्रमुख महेन्द्र महतोको अध्यक्षतामा भएको सो कार्याशालामा नगर उप प्रमुख सुनितासिंह बुढाथोकी, प्रमुख प्रशासकीय अधिकृत अशोक कुमार भण्डारी, वडा नं. ७ वडाअध्यक्ष रामबहादुर स्यांग्दन लगायत विभिन्न शाखा प्रमुख तथा कर्मचारीहरुको उपस्थिति रहेको नगरपालिकाले जनाएको छ ।
कार्याशालामा परियोजना सुरु गरिएको अवधी २०७८ फाल्गुन १७ गतेदेखि आउने लागेको २०८१ जेठ २ गतेसम्मको परियोजनाको कार्यान्वयनको अवस्था, उपलब्धी, चुनौती तथा अवसर, बजेट परिचालन तथा खर्च, दिगोपना र अगामी योजनाबारे छलफल गरिएको परियोजनाका पालिका बाल विकास संयोजक बविता खड्काले जानकारी दिनुभयो ।
कार्याशालामा मिथिला नगरपालिकाका प्रमुख महतोले परियोजनाको प्रभावकारिता विद्यालय, विद्यार्थी तथा अभिभावकहरुको प्रत्यक्ष रुपमा देखिएकाले परियोजनालाई अगामी दिनमा समेत निरन्तरता दिने बताउनुभयो ।
नगर प्रमुख महतोले परियोजनाको निरन्तरताका लागि नगरपालिकाले बजेट विनियोजना गर्ने र दातृ तथा सहयोगी निकायलाई समेत साथमा लिएर अगाडी बढ्ने विश्वास दिलाउनुभयो ।
यता कार्याशालालाई सम्बोधन गर्दै उप प्रमुख बुढाथोकीले परियोजनाको सबै पक्ष सबल र प्रभावकारी देखिएकाले यसलाई अगामी दिनमा पनि निरन्तरता दिनुपर्नेमा जोड दिनुभयो । उहाँले परियोजनाबाट प्राप्त उपलब्धीलाई दिगोपना दिन पालिकास्तरबाट निरन्तर अनुगमन गर्नुपर्ने धारणा राख्नुभयो ।
कार्यक्रममा सार्वजनिक नमुना माध्यमिक विद्यालय बेंगाडाबरका शिक्षिका श्यामकुमारी महतोले परियोजना अन्तर्गत आफुहरुले पाएको तालिम तथा सीपको प्रयोगले विद्यार्थी केन्द्रीत सिकाइमा बल पुगेको र बालबालिका तथा अभिभावकहरुमा समेत अनुशासन, व्यवहार र सोचमा परिवर्तन ल्याएको दावी गर्नुभयो ।
सेतो गुराँस बालविकास सेवा महोत्तरीको आयोजना तथा मिथिला नगरपालिकाको समन्वयमा युनिसेफ नेपालको आर्थिक सहयोग एंव सेतो गुराँस राष्ट्रिय बालविकास सेवाको प्राविधिक सहयोग परियोजना संचालन भएको सो परियोजनामा आर्थिक वर्ष २०७८/०७९ रु. १५ लाख, आर्थिक वर्ष २०७९/०८० रु. १२ लाख २५ हजार र आ.व. २०८०/०८१ रु. ३५ लाख ३० हजार रुपैयाँ बजेट परिचालन भएको विवरण प्रस्तुत गरिएको छ ।
परियोजना अन्तर्गत आ.व. २०८०/०८१ बाल विकासमा ८३१ जना, कक्षा १ मा ५४१ जना, कक्षा २ मा ४९६ जना कक्षा ३ मा ५०० जना, दलितमा ६१९ जना र अपाङ्गता भएका ५ जना बालबालिकालाई प्रारम्भिक बाल सिकाईमा जोडिएको पालिका बाल विकास संयोजक खड्काले जानकारी दिनुभयो । सो परियोजनाबाट १९५ जना जनप्रतिनिधी, १४४ जना शिक्षकशिक्षिका, २५११ बालबालिका र १२५ जना पालिका र अन्य निकायका कर्मचारीहरु लाभान्वित भएको बताइएको छ । नगरपालिकामा ४२ वटा बालविकास केन्द्र, एक वटा पालिकास्तरीय प्रारम्भिक बालविकास समिति र ११ वटा वडास्तरीय प्रारम्भिक बालविकास समिति, ४ वटा पोषण उपचार केन्द्र रहेको छ ।
कार्याशालामा परियोजनाबाट भएको उपलब्धी, परियोजनाले पारेको प्रभाव, अगामी रणनीति बारे वृक्षचार्टहरु प्रस्तुत गरिएको थियो । सो कार्याशालामा सेतो गुराँस राष्ट्रिय बालविकास सेवाका कार्यक्रम संयोजक रितिका दहाल, सेतो गुराँस राष्ट्रिय बालविकास सेवा महोत्तरीका जिल्ला संयोजक नितु मिश्रा लगायतले सहजीकरण गर्नुभएको थियो ।
यसअघि बैशाख ११ गते मंगलबार नगरपालिकाकाे प्रारम्भिक बालविकासका लागि भएका एकीकृत याेजना कार्यान्वयनकाे समीक्षा तथा अगामी याेजना बारे कार्याशाला भएकाे थियाे ।
