स्वागतम खबर
ढल्केवर, जेठ ५ ।
राष्ट्रिय खोप कार्यक्रम अन्तर्गत आई. पि.भी खोप अभियान २०८१ यहि जेठ १३ गतेदेखि २६ गतेसम्म देशव्यापी रुपमा संचालन हुने भएको छ । पोलियो रोग उन्मुलनका लागि देशव्यापी रुपमा आई. पि.भी खोप अभियान २०८१ संचालन गर्न लागिएको छ ।
शनिवार धनुषाको मिथिला नगरपालिकामा आयोजित नगरस्तरीय खोप समन्वय समितिको एक दिने अभिमुखिकरण गोष्ठीलाई सहजीकरण गर्दै स्वास्थ्य कार्यालय धनुषाको खोप अधिकृत राजदेव यादवले अभियान अन्तर्गत २०७३ बैशाख देखि २०७५ असोजको बीचमा जन्मेका बच्चालाई पोलियो विरुद्धका आई. पि.भी खोप लगाईने कार्यक्रम रहेको जानकारी दिनुभयो ।
“पोलियोमाईलाईटिस” पोलियो भाइरसबाट संक्रमण हुने यो रोगका विरामीहरु हाल पाकिस्तान र आफगानिस्तानमा मात्र देखापरिरहेको छ ।
अधिकृत यादवले जेठ १३ गतेदेखि २६ गतेसम्म संचालन हुने देशव्यापी अभियान अन्तर्गत मिथिला नगरपालिकामा पनि २०७३ बैशाख देखि २०७५ असोजको बीच जन्म भई उक्त खोप लगाउन छुटेका ५ वर्ष ७ महिनादेखि ८ वर्षसम्मका बालबालिकालाई मात्र लगाउने कार्यक्रम रहेको बताउनुभयो । उहाँले २०७३ बैशाख देखि २०७५ असोजको बीचमा जन्म भएका बालबिालकालाई उक्त खोप लगाउन छुटेकाले आई. पि.भी खोप अभियान २०८१ संचालन गर्न लागिएको स्पष्ट पार्नुभयो ।
विश्वमा पोलियो रोग उन्मुलनको क्रममा रहेपनि पाकिस्तान र आफगानिस्तानमा मात्र पोलियोका विरामीहरु देखापरेकाले विभिन्न देशका मानिसहरु दुवै देशमा आवत जावत गर्न सक्ने भएकाले सम्भावित जोखिम र संक्रमणको अवस्थालाई मध्यनजर गर्दै नेपालमा खोप लिन छुटेका बालबालिकालाई आई. पि.भी खोप लगाउन लागिएको उहाँको भनाई थियो । ती दुवै देशमा पोलियोको संक्रमण नरोकिएसम्म विश्वका अन्य देशहरुमा पनि जोखिम हुन सक्ने सम्भावनालाई मध्यनजर गर्दै पोलियो खोपको कभरेज कम भएको देश र स्थानका बालबालिकालाई खोप लगाईने छ ।
कुनै निश्चित उपचार नभएकाले पोलियो भाइरसबाट संक्रमण भएका व्यक्तिलाई पक्षघात हुन सक्ने र मृत्यु समेत हुने सक्ने जोखिम भएकाले यो रोग विरुद्धको खोप लगाउनु नै पोलियो रोगबाट बच्न सक्ने सबैभन्दा उत्तम उपाय रहेको स्वास्थ्य विज्ञहरु बताउँँछन् ।
पोलियो भाइरस विरुद्ध दुई प्रकारका खोप लगाउनुपर्ने मिथिला नगरपालिकाका प्रमुख प्रशासकीय अधिकृत समेत रहेका स्वास्थ्य शाखा प्रमुख अशोक कुमार भण्डारीले बताउनुभयो ।
तीन प्रकारका रहेका पोलियो भाइरसले जुनसुकै उमेरका मानिसलाई संक्रमण गर्ने सक्ने भएपनि पाँच वर्ष मुनिका बालबालिका बढी जोखिममा रहेकाले नगरभरि उक्त खोप लगाउन बालबालिकालाई लक्षित गर्दे अभियान अन्तर्गत खोप लगाउन उहाँले सबै स्वास्थ्यकर्मीलाई आग्रह गर्नुभयो । यसपालीको खोप अभियान विद्यालय केन्द्रित भएपनि खोप लिन छुटेका बालबालिकाका लागि वडाका स्थास्थ्य चौकीमा एकदिन खोप लगाईने कार्यक्रम राखिएको जानकारी दिनुभयो ।
मिथिला नगरपालिका पूर्ण खोप घोषणा भईसकेकाले नयाँ जन्मिदैँ गरेको बालबालिकालाई खोप तालिका अनुसार समयमै खोप दिएर यसको दिगोपना कायम राख्नुपर्ने र तथ्यांक अपडेट राख्नुपर्नेमा जनप्रतिनिधीहरुले जोड दिनुभयो । सो अभिमुखिकरणमा मिथिला नगरपालिका जनप्रनिनिधी र स्वास्थ्य चौकीका प्रमुख तथा स्वास्थ्यकर्मीहरुको सहभागिता रहेको थियो ।
