स्वागतम खबर
ढल्केवर, भदौ २९ ।
आज भदौ २९ गते अर्थात राष्ट्रिय बाल दिवस । आज २९औं राष्ट्रिय बाल दिवस देशभरि विविभ कार्यक्रमका साथ मनाईएको छ । सरकार तथा देशभरि बालबालिकाको हक अधिकारको क्षेत्रमा क्रियाशिल संघसंस्था, बाल क्लवले विविध कार्यक्रम सहित दिवस मनाएको छ । बाल दिवसको अवसरमा धनुषाको मिथिला नगरपालिका र नगर बाल संजालले सचेतना मूलक रैली तथा अन्तरक्रिया कार्यक्रम गरेको छ ।
बालबालिकामा लगानी, सुनिश्चित भविष्यको थालनी मूल नाराका साथ मनाइएको बाल दिवसको अवसरमा बाल अधिकार तथा स्थानीय सरकारको भूमिका बारे मिथिला नगरपालिकाका उपमेयर सुनितासिंह बुढाथोकीले सहभागी बालबालिकाहरुलाई बताउनुभयो । कार्यक्रममा सहभागी बालबालिकाले राखेको जिज्ञासाको जवाव फनि उपमेयर सिंहले दिनुभएको थियो । ढल्केवरस्थित महेन्द्र माध्यमिक विद्यालयमा भएको अन्तरक्रिया कार्यक्रममा उपस्थित बालबालिकाहरुलाई प्रशिक्षक तथा अधिवक्ता गुनु सुनारले बाल अधिकार र ऐन कानुन बारे जानकारी गराउनुभयो ।
यस्तै बालबालिकामा देखिने मनोसामाजिक समस्याको बारेमा टिपिओ नेपालका विना कडारीले आफ्नो कुरा राख्नुभएको थियो । सो कार्यक्रममा मिथिला नगरपालिकाका प्रवक्ता तथा वडा नंं ७ का वडाअध्यक्ष रामबहादुर स्यांग्दन, मिथिला नगरपालिकाका महिला, बालबालिका तथा ज्येष्ठ नागरिक शाखा प्रमुख मिलन श्रीवास्तव, द एशिया फाउण्डेशनका मञ्ज विश्वकर्मा, ईलाका प्रहरी कार्यालय ढल्केवरका प्रहरी सहायक निरिक्षक प्रेम पुकार चौधरीले आ-आफ्ना धारणा राख्नुभएको थियो । यसअघि मिथिला नगरपालिकाको कार्यालयबाट बाल संजालको नेतृत्वमा निकालिएको सचेतना मूलक रैली ढल्केवरको परिक्रमा गरिएको नगर बाल संजालका अध्यक्ष आनन्द कुमार सिंहले जानकारी दिनुभयो ।
के हो बाल दिवस ?
बालबालिकाको बाँच्न पाउने, विकास गर्न पाउने, संरक्षण पाउने, आफ्नो बारेमा गरिने नीति निर्णय र सामाजिक गतिविधिहरूमा सक्रिय र अर्थपूर्ण सहभागिता हुन पाउनुपर्ने, आफ्नो विचार व्यक्त गर्न पाउने अधिकारहरूको सम्मिश्रण हो ।
बाल अधिकार सम्बन्धी महासन्धि सन् १९८९ नोभेम्बर २० मा संयुक्त राष्ट्र संघको महासभाबाट बालबालिकाको अधिकारका निम्ति पारित राज्य राज्यहरूबिचको एक साझा सम्झौता पत्र हो । बाल अधिकार आदर्श र घोषणा पत्रमा मात्र सीमित नराखेर यसलाई बाल विकासको व्यवहारिक स्वरूप दिन यस महासन्धिको प्रतिवादन गरिएको हो । नेपालले १९९० सेप्टेम्बर १४ मा अनुमोदन गरिसकेको छ । आजको परिवर्तित समय सँगसँगै बाल अधिकारलाई देशको मूल कानुन संविधानमै पनि समेटिएको छ ।
नेपालमा विक्रम सम्वत २०२१ मा नेपालमा पहिलो पटक राष्ट्रिय बाल दिवस मनाइएको थियो । भदौ ४ गते मनाउँदै आएको बाल दिवस नेपालमा शासन पद्धति र शासकीय व्यवस्थाको परिवर्तन सँगै बाल दिवस मनाउने मिति पनि परिवर्तन भयो । नेपालले बाल अधिकारसम्बन्धी महासन्धि १९८९ लाई १४ सेप्टेम्बर १९९० मा अनुमोदन गरेर बालबालिकाको विकास, बाल अधिकारको संरक्षण र बाल सहभागिता जस्ता विषयमा आफ्नो अन्तर्राष्ट्रिय प्रतिबद्धता प्रकट गरेको दिनकै अवसरमा नेपालले हरेक वर्ष भदौ २९ गते राष्ट्रिय बाल दिवस मनाउँदै आएको छ भने अन्तर्राष्ट्रिय बाल दिवस भने नोभेम्बर २० तारिखमा मनाइने चलन छ ।
