स्वागतम खबर
महेन्द्रनगर, असाेज ८।
धनुषाको क्षीरेश्वरनाथ नगरपालिकामा संचालित स्थानिय शासन प्रक्रियामा युवा संलग्नता प्रबर्द्वन परियोजना (प्रोयेल) अन्तर्गत संचालित सुरिक्षत वैदेशिक राेजगारीमा युवा सहभागिता उप परियाेजनाकाे समिक्षा गर्दै मंगलबार समापन गरिएकाे छ । विगत एक वर्षदेखि संचालित साे उप परियाेजना बारे क्षीरेश्वरनाथ नगरपालिकाकाे सभाकक्षमा भएकाे सराेकारबलाहरुसँगकाे समन्वय बैठकमा कार्यक्रमकाे प्रभावकारिता, उपलब्धि, समिक्षा तथा अगामी कार्यदिशा बारे छलफल गर्दै समापन गरिएकाे छ ।
दर्पन सामुदायिक सुचना तथा संचार केन्द्रका अध्यक्ष रामसिठ महताेकाे अध्यक्षता तथा नगर प्रमुख सुखदेव यादवकाे प्रमुख आतिथ्यमा भएकाे सराेकारबलाहरुसँगकाे समन्वय बैठकमा सहभागीहरुले सुरक्षित वैदेशिक राेजगारीमा युवा सहभागिता उप परियाेजना अन्तर्गत संचालन गरिएकाे तालिम, अन्तरक्रिया, बैठक,रेडियो कार्यक्रमकाे उपलब्धि, प्रभावकारिताका समिक्षा गर्दै सहभागीहरुले प्रशंसा गरेका थिए । देश वैदेशिक राेजगारमै निर्भर हुन थालेकाे वर्तमान समयमा वैदेशिक राेजगारलाई सुरक्षित र मर्यादित बनाउन तथा जनचेतना जगाउन याे कार्यक्रम निकै सान्दर्भिक रहेकाेले यसकाे अवधी अझ बढाउनुपर्नेमा सहभागीहरुकाृ जाेड थियाे ।
बैठकमा नगरपालिकाका उप प्रमुख रचना माथेमा, वडा नं. ३ का वडाअध्यक्ष अमरकिशाेर सिंह, ६ का विनाेद प्रसाद गुप्ता, ७ का माे. नथुनी कवाडी, ८ क माेदकुमार महताे र १० का रामपदार्थ यादव, शिक्षा शाखा प्रमुख दिपक खत्री, सहयाेगी समाज नेपाल सर्लाहीका परियाेजना अनुगमन अधिकृत जनक अधिकारी, युथ प्यानलका माेहम्मद खुर्सैद राईन, ईलाका प्रहरी कार्यालय महेन्द्रनगरका प्रहरी हवल्दार रामप्रसाद मण्डल लगायत संस्थाका कर्मचारी तथा प्रतिनिधिहरुकाे उपस्थिति रहेकाे थियाे ।
विगत एक वर्षकाे अवधीमा साे उप परियोजना अन्तर्गत विदेश जाने तयारीमा रहेका, विदेशबाट फर्केका पालिकाभरिका युवाहरुलाई कानुनी, श्रमकाे अवस्था, कामकाे जाेखिम, सिप तथा याेग्यता, दक्ष र अदक्ष कामदारमा हुने व्यवहार, वित्तिय जाेखिम तथा वित्तीय साक्षरता सम्बन्धि करिव तीन दर्जन कार्यक्रम र तालिम संचालन गरिएकाे संस्थाका अध्यक्ष रामसिठ महताेले जानकारी दिनुभयाे ।
युरोपियन युनियन, हेल्भेटास नेपाल संगको वित्तिय सहकार्य तथा सहयोगी समाज नेपाल र दर्पन सामुदायिक सूचना तथा संचार केन्द्र धनुषाको सहजीकरणमा क्षीरेश्वरनाथ नगरपालिकामा सुरक्षित वैदेशिक राेजगारीमा युवा सहभागिताका लागि साे उप परियोजना संचालन गरिएकाे थियाे ।
