स्वागतम खबर
महेन्द्रनगर, कार्तिक ९ ।
धनुषाको क्षीरेश्वरनाथ नगरपालिका वडा नं. ८ दिगम्बरपुरस्थित श्री शिवशक्ति कृषि सहकारी संस्था लि.कोे १३औं वार्षिक साधारणसभा शुक्रवार सम्पन्न भएको छ । संस्थाका अध्यक्ष केशवलाल सिंहको अध्यक्षता तथा मधेश प्रदेशका सभामुख एवं धनुषा निर्वाचन क्षेत्र नं. १ (ख) का प्रदेश सांसद रामचन्द्र मण्डलको प्रमुख आतिथ्यमा साधारणसभा सम्पन्न भएको हो ।
साधारणसभाममा विशिष्ट अतिथिको रुपमा सहभागी क्षीरेश्वरनाथ नगरपालिका वडा नं. ८ का वडाअध्यक्ष मोदकुमार महतो (मोदी), समाजसेवी रामखेलावन महतो, राजेन्द्र प्रसाद सिंह लगायतले संस्थाको प्रगतिको कामना गर्दै शुभकामना मन्तव्य राख्नुभएको थियो ।
संस्थाको प्राङ्गणमा भएको साधारणसभा समारोहमा संस्थाको वार्षिक लेखापरिक्षण प्रतिवेदन, आयव्यय प्रस्तुत गरिएको छ । साधारणसभामा संस्थाको प्रबन्धक राजेश प्रसाद सिंहले आयव्यय प्रतिवेदन प्रस्तुत गर्नुभएको थियो ।
प्रस्तुत प्रतिवेदन अनुसार श्री शिवशक्ति कृषि सहकारी संस्थामा आर्थिक वर्ष २०८०/०८१ मा ५ लाख ७५ हजार ८ सय ९४ रुपैयाँ शुद्ध नाफा भएको उल्लेख छ । संस्थाले आर्थिक वर्ष २०८०/०८१ मा ५६ लाख ६५ हजार रुपैयाँ ऋण लगानी गरेको छ भने ५३ लाख ८ हजार ८ सय ३५ रुपैयाँ ऋण असुली गरेको प्रतिवेदनमा उल्लेख छ । प्रतिवेदन अनुसार लगानी भएको ऋणबाट संस्थाले १६ लाख १९ हजार ६ सय ४५ रुपैयाँ ब्याज आम्दानी गरेको छ । यस्तै शेयर विक्रीबाट ९ लाख ७८ हजार ५ सय रुपैयाँ आएको छ भने बचतमा ९३ लाख ५७ हजार ५० रुपैयाँ जम्मा गरेको छ । संस्थाको शेयर पुँजी बढाउँदै अहिले १९ लाख २७ हजार ८ सय रुपैयाँमा पुग्याएको प्रबन्धक सिंहले जानकारी दिनुभयो ।
प्रतिवेदन अनुसार संस्थामा आर्थिक वर्ष २०८०/०८१ मा १ सय ६५ जना पुरुष र ७३ जना महिला गरी जम्मा २ सय ३८ जना शेयर सदस्य रहेका छन् । गत आ.व.मा संस्थाबाट ५३ जना पुरुष र २१ जना महिलाले ऋण लिएको जनाएको छ ।
यसैबीच संस्थाको १३औं साधारणसभाले संचालक समितिले गरेका विभिन्न निर्णयहरुलाई समेत अनुमोदन गरेको संस्थाका प्रबन्धक सिंहले बताउनुभयो ।
साधारणसभामा संस्थाको संचालक समितिका पदाधिकारी, शेयरधनी, बचतकर्ता लगायतको स्थानीयहरुको उपस्थिति रहेको थियो । सो अवसरमा संस्थाले प्रमुख अतिथि, विशिष्ट अतिथि लगायत विभिन्न व्यक्तित्वहरुलाई दोसल्ला ओढाई सम्मान समेत गरिएको थियो । साधारणसभा समारोहको संचालन संस्थाका उपाध्यक्ष रामसिठ महतोले गर्नुभएको थियो ।
