स्वागतम खबर
जनकपुरधाम, मंसिर १६ ।
देशभरि रिक्त ४१ स्थानमा शनिबार भएको उपनिर्वाचनमा करिब ६२ प्रतिशत मत खसेको निर्वाचन आयोगले जनाएको । आयोगले आइतबार साँझ विज्ञप्ति जारी गर्दै मतदान कार्य शान्तिपूर्ण र उत्साहजनक रूपमा सम्पन्न भएको जनाएको छ । आयोगका अनुसार मतपेटिका संकलन कार्य भईरहेको र मतपेटिका संकलन भएपछि तत्कालै मतगणना प्रारम्भ गर्न निर्देशन दिइएको छ ।
उपनिर्वाचनमा २५ वटा राजनीतिक दल दर्ता भएकोमा २० वटा राजनीतिक दलको तर्फबाट उम्मेदवारी परेको थियो । उपनिर्वाचनमा राजनीतिक दलका २७४ जना र स्वतन्त्र १०२ जना गरी जम्मा ३७६ जना उम्मेदवार थिए । उपनिर्वाचन भएका स्थानीय तह तथा वडाको अन्तिम मतदाता नामावलीमा २ लाख २६ हजार ७९९ मतदाता रहेको आयोगले जनाएको छ ।
नगरपालिकाका प्रमुख एक जना, उपप्रमुख एक जना, गाउँपालिकाका अध्यक्ष दुई जना, उपाध्यक्ष चार जना तथा वडा अध्यक्ष ३३ जना गरी जम्मा ४१ पदका लागि उपनिर्वाचन भएको हो । उपचुनाव अन्तर्गतै यसअघि ओखलढुंगा र कैलाली जिल्लाको जिल्ला समन्वय समितिको प्रमुखमा क्रमशः नेपाली कांग्रेसका उम्मेदवार टेकराज भट्टराई र टीका कुमारी चौधरी (भुल) निर्विरोध निर्वाचित भएका थिए । यस्तै रूकुम (पूर्वी भाग) जिल्ला पुथा उत्तरगंगा गाउँपालिका–२ को वडाध्यक्षमा पनि जगत घर्ती निर्विरोध निर्वाचित भएका थिए ।
