स्वागतम खबर
महेन्द्रनगर , माघ २६ ।
धनुषाको मिथिला नगरपालिका २ नक्टाझिजस्थिति हिमालय युवा क्लवको ३०औं वार्षिक साधारणसभा शनिवार सम्पन्न भएकाे छ । क्लवका अध्यक्ष विजयकुमार महताेकाे अध्यक्षता तथा मधेश प्रदेश सरकारका खृलकुद तथा सामाजिक विकास मन्त्री प्रमाेद जयसवालकाे प्रमुख आतिथ्यमा साधारणसभा मनाइएकाे छ ।
साधारणसभालाई सम्बोधन गर्दै प्रमुख अतिथि मन्त्री जयसवालले युवाहरुमा खेलकुदकाे माध्यमबाट पनि समाज परिवर्तका लागि सकारात्मक सोच र भावनाको विकास गर्दै अगाडि बढ्नु पर्ने आवश्यक रहेबाे बताउनुभयाे । उहाँले खेलकुदका साथै शिक्षा, स्वास्थ्य, समाजिक सेवा र कार्यमा पनि अब युवाहरुले अग्रसरता लिनुपर्ने धारणा राख्नु भयाे । मन्त्री जयसवालले हिमालय युवा क्लवकाे खेल मैदान निर्माणका लागि आफुले पहलकदमी लिने विश्वास दिलाउनुभयाे । उहाँले क्लवकाे खेल मैदान समेत निरिक्षण गर्नुभयाे ।
साधारणसभाको अवसरमा विशिष्ट अतिथिको रुपमा मिथिला नगरपालिकाका नगर प्रमुख महेन्द्र महतो, वडा नं. २ का वडा अध्यक्ष विहारी महतो, क्लवको कानुनी सल्लाहकार तथा अधिवक्ता डा.कालेश्वर महतो लगायत विभिन्न क्षेत्रका वक्ताहरुले आ–आफ्नो शुभकामना मन्तव्य राखेका थिए । साधारणसभा कार्यक्रमको उद्घोषण क्लवका सचिव महादेव सिंहले गरेका थिए ।
साधारणसभाको अवसरमा क्लवको वार्षिक आयव्यय विवरण र वार्षिक प्रगति विवरण प्रस्तुत गरिएको छ ।
यता साधारणसभाकै अवसरमा भएको रक्तदान कार्यक्रममा तीन दर्जनभन्दा बढीजनाले रक्तदान गरेका छन् । क्लवले प्रत्येक वर्ष साधारणसभाको अवसरमा ‘रक्त दान जीवन दान’ मूल नाराका साथ रक्तदान कार्यक्रम गर्दै आएको छ । यस्तै साधारणसभाकाे अवसरमा क्लवले आयाेजना गरेकाे विभिन्न खेलकुद, हाजिरी जवाफ लगायतकाे प्रतियोगिताका विजेताहरुलाई पुरस्कार तथा सम्मान वितरण गरेकाे जनाएकाे छ ।
समाजिक, सांस्कृति, खेलकुद, शिक्षा, स्वास्थ्य, सरसफाइ लगायतको क्षेत्रमा क्लवले अग्रणी भूमिका खेल्दै आएको छ । ग्रामीण क्षेत्रकै सबैभन्दा चर्चित र सक्रिय युवा क्लवको रुपमा हिमालय युवा क्लवलाई चिनिँदै आएको छ ।
