पत्रकार एवं कथाकार झाकाे खुशी पुस्तक विमाेचन

स्वागतम खबर
जनकपुरधाम, फाल्गुन ३ ।
जनकपुरकाे मैथिली साहित्य क्षेत्रमा एकपछि अर्काे कृति लेख्दै आउनु भएका पत्रकार तथा कथाकार सुजितकुमार झाले लेखेकाे अर्काे नव कृति ‘खुशी’ शनिवार एक समारोहका बीच विमाेचन गरिएकाे छ । मोडेल खबरका सम्पादक समेत रहनु भएका कथाकार झाद्वारा लिखित ‘खुशी’ पुस्तकको एक समारोहकाबीच विमोचन गरिएको छ । पुस्तकको विमोचन पूर्वाञ्चल विश्वविद्यालयका रजिष्ट्रार नीलमणि पोखरेलले गर्नुभएकाे छ ।
सम्पादक झाले जनकपुरधाममा शिक्षा क्षेत्रमा नाम कमाएका तथा मोडल कलेजका संस्थापक वीरेन्द्र कुमार साहको जीवनी तथा उहाँका संघर्षका कथाहरुलाई आफ्नाे नवकृति ‘खुशी’ मा समेट्नु भएकाे छ ।
पुस्तकको विमोचन गर्दै प्रमुख अतिथि पोखरेलले सफलताको खुशी पाउनलाई धैर्यको बाँध टुट्न दिनु हुँदैन बताउनुभयाे । उहाँले जीवनमा आउने कठिनभन्दा कठिन परस्थितिमा पनि आफ्नो धैर्यतालाई गुमाउनु हुँदैन भन्ने सन्देश खुशी पुस्तकले दिने विश्वास व्यक्त गर्नुभयाे ।
अर्का प्रदेशसभा सदस्य रामअशिष यादवले जस्तोसुकै कमजोर स्थितिमा रहेपनि लक्ष्य हाशिल गर्न सकिने, संघर्ष गर्दै कसरी अगाडी बढ्ने र कठिन परस्थितिमा पनि आफ्नो अनुकुल वातावरण कसरी बनाउन सकिन्छ भन्ने विषय वस्तु खुशी पुस्तकमा समेटिएकाले समाजकालागि उपयोगी पुस्तक साबित हुने बताउनुभयाे । यसका साथै प्रदेशसभा सदस्य यादवले युवाहरुलाई शिक्षा बिना खुशी प्राप्त गर्न नसकिने भएकाले शिक्षकको सम्मान गर्न समेत आग्रह गर्नुभयाे ।
कार्यक्रमको अध्यक्षता समेत गरेका प्राध्यापक डा. सुरेन्द्र लाभले कुनै पनि व्यक्ति अवसादमा पुग्दा स्वेट मार्टिनको मोटिभेसनल पुस्तकहरु पढ्छन्, खुशी पुस्तक पनि त्यस्तै रहेको भन्नुभयाे । उहाँले आफ्नै माटोका व्यक्तिको संघर्षका कथा खुशी पुस्तकको माध्यमले पढेर मोटिभेट हुने विश्वास व्यक्त गर्नुभयाे ।
प्राध्यापक डा. लाभले खुशी पुस्तकले एउटा बहादुरको कथा भनिरहेको छ, खुशी पुस्तककले बहादुरको इतिहास लेखेको उल्लेख गर्नुभयाे ।
कार्यक्रममा खुशी पुस्तकका मुख्य पात्र एवं मोडेल मल्टिपल कलेजका संस्थापक वीरेन्द्रकुमार साहले आफ्नो जीवनका भोगाईहरु साझा गर्नुभयाे । उहाँले ईच्छाशक्ति भए आफ्नै मातृभूमिमै रहेर केही गर्न सकिन्छ, लक्ष्य प्राप्त गर्न सकिन्छ भन्नुभयाे ।
मैथिली विकास कोषका अध्यक्ष जीवनाथ चौधरीले वर्तमान समयमा युवाहरुमा कठिन परस्थितिको सामना गर्ने क्षमताको अभाव रहेको बताउँदै खुशी पुस्तक र खुशी पुस्तकका पात्र वीरेन्द्र साहको जीवनले पक्कै कठिन परस्थितिमा कसरी अगाडी बढ्दै जाने हो भन्ने शिक्षा दिने बताउनुभयाे।
पत्रकार झाको पुस्तक ‘खुशी’ १७ औं कृति हो । यस अघि विभिन्न विधामा उनको १६ वटा कृति प्रकाशित भई सकेको छ ।