स्वागतम खबर
ढल्केवर चैत्र २३ ।
धनुषाको ढल्केवरमा मिथिला उद्योग वाणिज्य संघको बहुउपयोगी भवन निर्माणका लागि लगाइएको सप्ताहव्यापी श्रीमद्भागवत सप्ताह ज्ञान यज्ञ आज समापन भएको छ । मिथिला उद्योग वाणिज्य संघको आयोजनामा चैत्र १७ गते आइतवारदेखि शुरु भएको सप्ताह ज्ञान यज्ञ आज चैत्र २३ गते शनिवार सम्पन्न भएको छ ।
संघको बहुउपयोगी भवन निर्माणका लागि ढल्केवरस्थित खानेपानीको प्राङ्गणमा सञ्चालन भएको सो सप्ताहव्यापी श्रीमद्भागवत सप्ताह ज्ञान यज्ञमा मनकारी दाताहरुबाट करिव १८ लाख रुपैयाँ नगद संकलन भएको छ । यज्ञमा विभिन्न उद्योगी, व्यापारी, समाजसेवी, राजनीतिकर्मी लगायतले नगद सहयोग प्रदान गरेको संघका अध्यक्ष तेजनारायण साह (संतोष) ले जानकारी दिनुभयो ।
यस्तै मधेस प्रदेशसभाका सदस्य हरिनारायण महतोले मिथिला उद्योग वाणिज्य संघको बहुउपयोगी भवन निर्माणका लागि आफ्नो संसदीय कोषबाट २५ लाख रुपैया बजेट उपलब्ध गराउने उद्घोष गरेको उहाँले बताउनुभयो ।
संघको भवन निर्माणार्थ आयोजित श्रीमद् भागवत सप्ताह ज्ञान यज्ञमा नगद करिव १८ लाख रुपैयाँ संकलन भएको र प्रदेशसभा सदस्य महतोले आफ्नो संसदीय कोषबाट २५ लाख रुपैया बजेट उपलब्ध गराउने उद्घोष गरेको यज्ञ मूल आयोजक समितिका संयोजक समेत रहेका अध्यक्ष साहले जानकारी बताउनुभयो ।
उहाँका अनुसार संघको बहुउपयोगी भवन निर्माणका लागि मिथिला नगरपालिकाले ढल्केवरमा तीन कठ्ठा जमिन उपलब्ध गराएको छ । नगरपालिकाकै सात लाख रुपैयाँको लागतमा पर्खाल निर्माण गरी क्षेत्र घेराबेरा गरिएको छ । प्रस्तावित भवन निर्माण भएपछि उद्योग वाणिज्य संघको कार्यालय, गोष्ठी, सेमिनार, विवाह, ब्रत बन्धजस्ता विविध कार्यका लागि भवन उपयोग गरिने उहाँले भन्नुभयो ।
यज्ञको प्रचारप्रसार उपसमितिका संयोजक गणेश महतोका अनुसार सप्ताहव्यापी धार्मिक अनुष्ठानमा श्रीकृष्ण प्रणामी मन्दिर केन्द्रीय नवतन्धामका महन्त स्वामी श्री १०८ पुरुषोत्तम महाराजले कथा वाचक गर्नुभएको थियो । यज्ञमा कथा वाचनसँगै सप्ताह अवधिभर धर्म, भक्ति, कर्म र ज्ञान सम्बन्धी गहन सन्देश प्रवाह गर्दैे भजन–कीर्तन, झाँक्री विभिन्न आध्यात्मिक कार्यक्रमहरू समेत आयोजना गरिएको थियो । सो क्रममा हरेक दिन सयौं स्थानीय तथा बाह्य भक्तजनहरुको उपस्थिति रहने गरेको थियो । संघको बहुउपयोगी भवन निर्माणका लागि आयोजना गरिएको धार्मिक यज्ञमा सहयोग गर्ने सम्पूर्ण व्यक्तित्वलाई खादा, सम्मान पत्र तथा मायाको चियो सहित धन्यवाद दिँदै सम्मान गरिएको महतोले बताउनुभयो ।
