स्वागतम खबर
महेन्द्रनगर, बैशाख १३ ।
धनुषाको धनुषाधामस्थित सव डिभिजन वन कार्यालय धनुषाधामले वन तथा वन्यजन्तु संरक्षण विषयमा धनुषाधाम नगरपालिका वडा नं. २ का स्थानीयहरुसँग शनिवार अन्तरक्रिया गरेको छ । धनुषाधामको संरक्षित वन तथा वन्यजन्तुको संरक्षणमा स्थानीय समुदायको महत्वपूर्ण भूमिका रहेकाले वन क्षेत्रको वरिपरि बसोवास रहेका गाउँटोलका स्थानीयहरुसँग वन तथा वन्यजन्तु संरक्षण विषयमा अन्तरक्रिया गरिएको सव डिभिजन वन कार्यालय धनुषाधामले जनाएको छ ।
संरक्षित वन क्षेत्रको रुपमा परिचित धनुषाधामको वन तथा वन्यजन्तुलाई वन कार्यालयले मात्र संरक्षण गरेर नहुने भन्दै यसमा स्थानीयको सहयोग, साथ र चासो महत्वपूर्ण रहेकाले समय–समयमा स्थानीयहरुसँग वन र वन्यजन्तु संरक्षणका लागि अन्तरक्रिया, गोष्ठी जस्ता कार्यक्रम गर्दै आएको सव डिभिजन वन कार्यालयका प्रमुख शंकरनारायण झाले जानकारी दिनुभयो । अन्तरक्रियाबाट आएका स्थानीयहरुको सुझावलाई प्राथमिकताका साथ योजना बनाएर कार्य गर्दै जाने उहाँले बताउनुभयो ।
कार्यक्रममा सहभागीहरुले वन क्षेत्रलाई अझ संरक्षणमा कडाका साथ लाग्नुपर्ने, वनमा भएको सुख्खा तथा सँडेगलेका काठ निकाल्नुपर्ने, खाली भएका ठाउँमा वृक्ष रोपण गर्नुपर्ने, जंगली वन्यजन्तुलाई पानी खान सहजताका लागि जंगल क्षेत्रभित्र रहेको पोखरीमा सधैंका लागि पानीको व्यवस्थापन गर्नुपर्ने, वाणगंगा नदीको उद्गम स्थललाई मर्मत संभार गरी ढिस्कोले पुरिएको पानीको मुहानलाई खोलेर संरक्षण गर्नुपर्ने लगायतका विषयमा आ–आफ्नो सुझाव दिएको कार्यालयका प्रमुख झाले जानकारी दिनुभयो । आफु यस सव डिभिजन वन कार्यालयमा प्रमुख भएर आएदेखि नै वन तथा वन्यजन्तु संरक्षणका लागि स्थानीय समुदायसँग टोलस्तरमै गएर छलफल गर्दै आएको र समुदायको सुझाव अनुसार योजना बनाएर कार्य गर्दै आएकाले धनुषाधाम संरक्षित वनको रुपमा चिनिएको उहाँको भनाइ छ ।
धनुषाधामस्थित सव डिभिजन वन कार्यालयको सभाहलमा शनिवार भएको अन्तरक्रिया कार्यक्रममा धनुषाधाम नगरपालिका वडा नं.२ धरमपुरको करिव तीन दर्जन स्थानीयहरुको सहभागिता रहेको थियो । कार्यक्रमका सहभागीहरु विगत १० वर्षको अवधिमा धनुषाधाम वन क्षेत्रमा भएको परिवर्तन र संरक्षणको कार्यलाई सराहना गरेका थिए ।
धनुषाधाम संरक्षित वन क्षेत्रभित्र यसै आ.व.मा धार्मिक एवं पर्यटक स्थलको रुपमा विकास गर्न रामायण बाटिका बनाउने कार्यको सुरुवात गर्ने योजना समेत रहेको धनुषाधाम वन संरक्षण क्षेत्र परिषद्का सचिव सत्यनारायण यादवले जानकारी दिनुभयो ।
