स्वागतम खबर
महेन्द्रनगर, बैशाख २८ ।
धनुषाको क्षीरेश्वरनाथ नगरपालिकाका मेयर सुखदेव यादवले नगरपालिकाका उप प्रमुख रचना माथेमाले आफूमाथि लगाएको सम्पूर्ण आरोपको खण्डन गरेका छन् । आइतवार विहान महेन्द्रनगरमा पत्रकार सम्मेलन गर्दै नगर प्रमुख यादव पालिकालाई सुन्दर बनाउन आफुले विकास निर्माणका कार्यहरु व्यवस्थित र पारदर्शी रुपमा गरेको देखेपछि नेपाली कांग्रेसको उक्साहटमा उप प्रमुख माथेमाले पालिका चलाउन नदिएको दावी गरे । उनले उप प्रमुख माथेमाले आफूमाथि विभिन्न आरोप लगाएर पञ्छिन खोजेको आरोप समेत लगाए ।
उप प्रमुख रचना माथेमा नेपाली कांगे्रसकी नेतृ समेत रहेकी भन्दै नगर प्रमुख यादवले कांग्रेसको उक्साहटमा आएर आफूमाथि तथानाम आरोप लगाएर आफ्नो कामकाजबाट पञ्छिन खोजेको दाबी गरे । उपमेयर माथेमा प्रायः काठमाडौँमै रहने गरेको भन्दै मेयर यादवले नगरपालिकाको कार्यालयमा एकदमै कम आउने गरेको बताए । उपमेयर माथेमा आफ्नो सेवासुविधा लिने गरे पनि जनताप्रतिको कर्तव्य निर्वाह नगरी अरुमाथि आरोप लगाउनु गलत रहेको मेयर यादवले बताए ।
उनले न्यायिक समितिमा आफूले एक कर्मचारी पठाए पनि न्याय सम्पादनको काम गर्न अनिच्छुक देखिनु दुःखद रहेको बताए । नगर प्रमुख यादवले भने ‘न्यायिक समितिको उजुरीको चाङ्ग छ, तर समितिको संयोजक उप प्रमुख बस्दैन, कर्मचारी मात्र के गर्छ ।’
रेडबुक उप प्रमुखलाई कनि नदिएको पत्रकारहरुको प्रश्नमा प्रमुख यादवले राजनीतिक विवादकै कारण ढिलो गरी नगरसभा भएको र रेडबुक छाप्न समय लागेको भएपनि अहिले नगर कार्यपालिकाको बैठकमा आउने सबैले रेडबुक पाइसकेको दावी गर्दै भने उप प्रमुख बैठकमै आउँदै अनि कसरी रेडबुक दिने, उनी आफै पनि नगर उप प्रमुख हो, लिन सक्छन् नि ?
सधैं काठमाडौं बस्ने अनि तीन तीन महिनामा आएर मात्र तलव भत्ता बुझ्ने उप प्रमुखले आफ्नो पदीय जिम्मेवारी अनुसार जनताको काम गर्न छोडेर पार्टीका उक्साहटमा पालिकाका राजनीतिक स्टन्ट गर्न खोजेको नगर प्रमुख यादवको गुनासो छ । सबैको सहमतिमै नगरसभाबाट चालु आवको लागि बजेट ल्याएको र आफुले उप प्रमुखको बजेट र योजनामा कते कुनै विभेद नगरेकोले प्रमुख र उप प्रमुख बीचमा योजना सम्बन्धि कुनै मतभेद नरहेको स्पष्ट गरे ।
निवर्तमान मेयर योगेन्द्र पँजियारले आफ्नो कार्यकालमा अपारदर्शीता, अनियमितता र अराजकतापूर्वक हैकमवादी शैलीमा पालिकालाई भद्रगोल बनाएको उनले आरोप लगाए ।
मेयर यादवले आफू निर्वाचित भएपछि पालिकाको कार्यालयलाई व्यवस्थित गरेको, पारदर्शी पूर्वक विकास निर्माणको कामकारबाही थालेको र अनुशासन तथा लोकतान्त्रिक पद्धति अनुसार जनताको हक अधिकारलाई कायम गरेको दाबी समेत गरे । उनले आफु निर्वाचित भएर आएदेखिको गरेको विकास निर्माणको जनमुखी कार्य विपक्षी पार्टीलाई अपन भएकाले उप प्रमुखलाई उक्साएर तथानाम गर्न खोजेको दावी गरे ।
नगर प्रमुख यादवले आफु आएदेखि स्थानीय, प्रदेश र संघ सरकारको करोडौंका विभिन्न विकासे योजनाहरु नगर विकासमा ल्याएको र कार्य भईरहेकोले बताए । उनले कोल्ड स्टोर, कृषि, शिक्षा, सडक कालोपत्रे लगायतमा संघ सरकारबाट बजेट ल्याएर विकास निर्माणका कार्य गरिरहेको बताएका छन् ।
