स्वागतम खबर
जनकपुरधाम, असार १५ ।
“धान बालीमा सघनता : खाद्य सुरक्षा र आत्मनिर्भरता” मुल नाराका साथ आज असार १५ गते अर्थात २२ औँ राष्ट्रिय धान दिवस मनाइएको छ । देशभरका किसानले धान रोपेर आज राष्ट्रिय धान दिवस मनाएका छन् । असार १५ को दिन च्यूरा दही खाएर धान रोपाई गरी दिवस मनाउने चलन छ । दही च्यूराले शरीरमा उर्जा दिने भएकाले धान रोपाईसँगै दही च्यूरा खाने गरिएको हो ।
यसै क्रममा धनुषाको राष्ट्रिय धानवाली अनुसन्धान कार्यक्रम हर्दिनाथ बनिनियाँले २२ औँ राष्ट्रिय धान दिवस धान रोपेर मनाइएको छ । राष्ट्रिय धानबाली अनुसन्धान कार्यक्रम हर्दिनाथको संयोजक मथुरा यादवको अध्यक्षतामा मनाइएको धान दिवसमा धनुषाका प्रमुख जिल्ला अधिकारी शंकरहरी आचार्य, एसपी नरहरी रेग्मी, सशस्त्र प्रहरी उपरिक्षक निर्मल खड्का, स्थानीय समाजसेवी कारीराम यादव, लक्ष्मीनियाँ गाउँपालिका वडा ५ का वडाअध्यक्ष दुखरण यादव लगायतको उपस्थिति रहेको थियो ।
धान दिवस कार्यक्रमलाई सम्बोधन गर्दै प्रमुख जिल्ला अधिकारी आचार्यले प्रत्येक वर्ष धान दिवस मनाउँदा पनि नेपाल खाद्यान्नमा आत्मनिर्भर हुन नसकेको बताउनुभयो । धानमा आत्मनिर्भर हुन के गर्नुपर्छ भन्नेतिर अब किसानले पनि विदेशी जातभन्दा पनि नेपालमै मनग्य उत्पादन हुने जातका धान खेतीतर्फ ध्यान दिन आवश्यक रहेको भन्दै उहाँले राष्ट्रिय धानवाली अनुसन्धान कार्यक्रम हर्दिनाथ बनिनियाँलाई यस कार्यमा किसानलाई सहयोग गर्न आग्रह समेत गर्नुभयो । उहाँले धानको निर्यातै गर्न नसकेपनि आयातलाई विस्थापन गरेर धानमा आत्मनिर्भर बन्नुपर्ने संकल्पका साथ अगाडि बढ्नुपर्ने बताउनुभयो । विदेश जातको धान रोप्ने तर फल नलाग्ने वा मनग्य नफल्ने भएपछि किसानमा नैराश्यता देखिएकाले बढी फल्ने स्वदेशी धान उत्पादनमै जोड दिन किसानमा जागरुकता ल्याउनुपर्नेमा प्रमुख जिल्ला अधिकारी आचार्यले उहाँले जोड दिनुभयो ।
वि.सं. २०६१ मंसीर २९ गते मन्त्रीस्तरीय निर्णय गरी २०६२ साल असार १५ गतेदेखि राष्ट्रिय धान दिवस मनाउन थालिएको हो । कृषि प्रधान देश भएकाले नेपालका अधिकांश मानिसको पेशा खेतीपाती हो । किसान वर्षभरका लागि छाक जुटाउन असार महिना खेतीमा व्यस्त हुन्छन् । आजका दिन असारे सुरमे लोक लयका गीत गाउँदै धान रोप्ने र थालपानि खेलेर मनारेञ्जन गर्ने चलन पनि रहेको छ ।
