विनोदकुमार महतो
ढल्केवर, असोज २५ ।

धनुषाको मिथिला नगरपालिका २ नक्टाझिजस्थित सामुदायिक कृषि सहकारी संस्था लिमिटेडले शनिवार १४औं वार्षिक साधारणसभा भव्य पूर्वक मनाएको छ । सामुदायिक कृषि सहकारी संस्था लि.का अध्यक्ष रितलाल महतोको अध्यक्षता तथा मिथिला नगरपालिकाका नगर प्रमुख महेन्द्र महतोको प्रमुख आतिथ्य साधारणसभा मनाइएको छ । साधारणसभालाई सम्बोधन गर्दै प्रमुख अतिथि मेयर महतोले संस्थाको आयव्यय विवरण र प्रगतिको प्रंशसा गर्दै संचालक समितिलाई धन्यवाद दिएका थिए । संचालक समितिका अध्यक्ष महतोलाई संस्था चलाउने स्मार्ट अध्यक्षका कारण संस्थाको प्रगति प्रशंसा गर्ने अवस्थामा पुगेको बताउनुभयो । अन्य सहकारीमा रकम अपचल, अपारदर्शी हिसाव किताव, पैसा लिएर संचालक समति फरार भएका जस्ता घटनाले सहकारीप्रति जनविश्वास घटि रहेको कठिन सयममा पनि सामुदायिक कृषि सहकारी संस्थाका स्मार्ट संचालक समति र अध्यक्षका कारण बचतकर्ता र शेयरधनीहरुको विश्वास र आकर्षण दिन दिनै बढ्दै गएकाले मेयर महतोले खुलेर प्रशंसा गरेका थिए ।


यता साधारणसभामा अगामी रणनीतिको विषयमा संचालक समितिको निर्णयहरु सार्वजनिक गर्दै अध्यक्ष महतोले यस वर्षदेखि बाल बचत, ऋण विमा र मोबाइल बैंकिङ्ग सेवाको सुरुवात गर्न लागेको जानकारी दिनुभयो । अध्यक्ष महतोले सामुदायिक कृषि सहकारी संस्था पारदर्शी रुपमा संचालन गर्दै आएको र कहिँ कतै पनि कसैको एक रुपैयाँ पनि अपचलन हुन नदिने प्रतिबद्धता समेत गर्नुभयो ।
साधारणसभाको अवसरमा संस्थाका लेखा समितिका संयोजक राजेन्द्र महतोले लेखा प्रतिवेदन र संस्थाका प्रबन्धक ललित कुमार महतोले संस्थाको आयव्यय विवरणको प्रतिवेदन प्रस्तुत गरेका थिए ।
सामुदायिक कृषि सहकारी संस्थाले संस्था नक्टाझिजले आर्थिक वर्ष २०८१/०८२ मा रु. २६ लाख ९० हजार २ सय ७० रुपैयाँ शुद्ध नाफा आर्जन गरेको छ । आर्थिक वर्ष २०८१/०८२ मा संस्थाले ८० लाख ८० हजार २ सय ८१ रुपैयाँ जम्मा आम्दानी गरेको छ भने विभिन्न शिर्षकमा ५३ लाख ९० हजार १० रुपैयाँ खर्च गरेको वित्तिय प्रतिवेदनमा उल्लेख छ ।
यस्तै ४ करोड ९० लाख २९ हजार ५ सय ८६ रुपैयाँ बचत जम्मा गरेको छ भने ५ करोड ६१ लाख २२ हजार ४ सय २० रुपैयाँ ऋण लगानी गरेको जनाएको छ । आ.व. २०८१/०८२ मा संस्थाको शेयर रकम भन्ने ७१ लाख १२ हजार २ सय रुपैयाँ पुगेको छ । संस्थाले आर्थिक वर्ष २०८१/०८२ मा संस्थाले ६८ लाख ४५ हजार ८ सय ८४ रुपैयाँ ऋणको ब्याजबाट आम्दानी गरेको छ भने सबै भन्दा बढी बचतको ब्याजमा रु. ३१ लाख २४ हजार ६ सय ६९ रुपैयाँ खर्च गरेको प्रतिवेदनमा उल्लेख छ । यता २ लाख ९८ हजार ९ सय १८ रुपैयाँ आयकर तिरेको प्रतिवेदनमा जनाएको छ । साधारणसभामा प्रस्तुत आय–व्यय प्रतिवेदन, लेखा परिक्षण प्रतिवेदन र प्रस्तावित वार्षिक कार्यक्रम तथा बजेट पारित भएको अध्यक्ष रितलाल महतोले जानकारी दिनुभयो ।
हाल ७१ जना महिला र ९२ जना पुरुष गरी १ सय ६३ जना ऋणी रहेको सामुदायिक कृषि सहकारी संस्थाको ऋण असुली दर हाल ९८ दशमलव ८० प्रतिशत रहेको संस्थाका प्रबन्धक ललित कुमार महतोले बताउनुभयो । ४ सय १७ जना महिला र ५ सय ४१ जना पुरुष गरी संस्थामा हाल जम्मा ९ सय ५८ जना सदस्य रहेका छन् ।
यता साधारणसभा कार्यक्रममा मिथिला नगरपालिका २ का वडाअध्यक्ष विहारी महतो, हिमालय युवा क्लवका संरक्षक अरुणकुमार महतो लगायतले शुभकामना मन्तव्य राखेका थिए । साधारणसभामा संस्थाको संचालक समिति, शेयरधनी, बचतकर्ता लगायत स्थानीयहरुको सहभागिता रहेको थियो । सभारणसभाका उपस्थित सहभागीहरुलाई संस्थाका उपाध्यक्ष किरण कुमारी महतोले स्वागत मन्तव्यले सत्कार गरेका थिए भने कार्यक्रमको संचालन टेक कुमार महतोले गरेका थिए ।


यसैबीच संस्थाले १४औं साधारणसभाको अवसरमा ३ जना उत्कृष्ट ऋणी र ३ जना उत्कृष्ट नियमित बचतकर्तालाई विभिन्न सामग्री सहित सम्मान समेत गरेको छ । संस्थाले उत्कृष्ट ऋणीमा दुर्गाटोल बस्ने सतार नदाफ, नक्टाझिज बस्ने सुनिता कुमारी देवी र हरिहरपुर बस्ने कुशमा देवीलाई सम्मान गरेको छ भने नियमित दैनिक बचतकर्तामा संजितराज श्रेष्ठ, बाल बचतकर्तामा विकास कुमार महतो र समृद्धि महिला मासिक बचतकर्तामा बविता कुमारीलाई सम्मान गरेको छ । यस्तै साधारणसभाको अवसरमा रक्तदान गरेको रक्तदाताहरुलाई सम्मान पत्र सहित सम्मान समेत गरेको थियो । विहान संचालन गरिएको रगत संकलन कार्यक्रममा महिला पुरुष गरी जम्मा ३३ जनाले रक्तदान गरेका थिए ।

धनुषाको महेन्द्रनगरमा कार्यालय संचालन गर्दै आएको सामुदायिक कृषि सहकारी संस्था लिमिटेडको १४औं वार्षिक साधारणसभा नक्टाझिजस्थित वडा कार्यालयको कभर्ड हलमा गरिएको छ ।
संस्थाले हाल कृषि ऋण, व्यापार ऋण, सुलभ ऋण, पशु कर्जा र तरकारी खेची कर्जा तर्फ लगानी गर्दै आएको छ । त्यस्तै बचत तर्फ स्वेच्छिक/समान्य, सामुदायिक बचत खाता, समृद्धि महिला बचत, दैनिक बचत, सामुदायिक मासिक बचत, आवधिक बचत, बाल बचत र शेयर बचतमा रकम जम्मा गर्दै आएको जनाएको छ ।