स्वागतम खबर
ढल्केवर, असाेज २९ ।

रेयुकाई एइको मासुनागा आँखा अस्पताल, ढल्केवरले मिथिला नगर पत्रकार सञ्जालको समन्वयमा पत्रकारहरूका लागि एकदिने अन्तरक्रिया कार्यक्रम सम्पन्न गरेको छ। प्रादेशिक अस्पताल जनकपुरका प्रमुख जामुन प्रसाद सिंहकाे प्रमुख आतिथ्यमा भएकाे कार्यक्रममा आँखा सम्बन्धी रोग, उपचार पद्धति र प्रक्रिया सम्बन्धी जानकारीमूलक अन्तरक्रिया गरिएको थियो।
बुधबार बिहान ११ बजेदेखि सुरु भएको उक्त कार्यक्रममा पत्रकारहरूले आँखा स्वास्थ्यसम्बन्धी महत्वपूर्ण जानकारी प्राप्त गर्नुका साथै निशुल्क आँखा परीक्षण, निःशुल्क औषधि वितरण, साथै चश्मामा विशेष छुट सेवा पनि प्राप्त गरेका थिए।
कार्यक्रममा बोल्दै आयोजक संस्थाका प्रतिनिधिहरूले पत्रकारहरू दिनरात समाजका सूचनाका संवाहक मात्र नभई, विभिन्न स्वास्थ्य जोखिमको चपेटामा पर्ने संवेदनशील वर्ग पनि भएकोले यस्ता कार्यक्रमले उनीहरूको स्वास्थ्यमा सघाउ पुर्‍याउने विश्वास व्यक्त गरे।
मिथिला नगर पत्रकार सञ्जालका पदाधिकारीहरूले अस्पताल पक्षलाई धन्यवाद ज्ञापन गर्दै भविष्यमा समेत यस्ता कार्यक्रमलाई निरन्तरता दिनुपर्नेमा जोड दिएका थिए।
कार्यक्रममा मिथिला नगरका क्रियाशील पत्रकारहरूको उल्लेखनीय उपस्थिति रहेको थियो।