स्वागतम् खबर
ढल्केवर, कार्तिक २९ ।

धनुषाको क्षीरेश्वरनाथ नगरपालिका ८ दिगम्वरपुरस्थित विवेकशिल साना किसान बहुउद्देश्य सहकारी संस्था लिमिटेडले शनिवार चौथो वार्षिक साधारणसभा भव्य पूर्वक मनाएको छ । संस्थाका अध्यक्ष रामकुमार महतोको अध्यक्षता तथा स्थानीय राम विलाश ठाकुरको प्रमुख आतिथ्यामा धनुषाको ढल्केवरस्थित राधाकृष्ण मन्दिरको सभाहलमा साधारणसभा मनाइएको छ ।
साधारणसभाको अवसरमा संस्थाका अध्यक्ष महतोले कम समयमै सहकारीलाई बडो मेहनतका साथ सबैको सहयोगमा अगाडी बढाउन मद्दत पुगेको बताउनुभयो । उहाँले आफुले कमाएको थोरै रकमबाट पनि केही खर्च बचाएर सहकारीमा बचत गर्न सदस्यहरुलाई आग्रह गर्नुभयो ।
विवेकशिल साना किसान बहुउद्देश्य सहकारी संस्था लिमिटेड दिगम्वरपुरको आर्थिक वर्ष २०८१/०८२ को आयव्यय प्रतिवेदन अनुसार ११ लाख ७७ हजार १ सय ८८ रुपैयाँ खुद आम्दानी गरेको छ । संस्थाले आर्थिक वर्ष २०८१/०८२ मा रु. २ करोड ४० लाख ७७ हजार ४ सय ४४ रुपैयाँ ऋण लगानी गरेको छ भने १ करोड ६५ लाख ७१ हजार ५ सय ५६ रुपैयाँ ऋण असुली गरेको जनाएको छ ।
यस्तै ६ करोड ६० लाख ३७ हजार ४ सय २३ रुपैयाँ बचत जम्मा गरेको संस्थाका अध्यक्ष महतोले बताउनुभयो । प्रतिवेदन अनुसार संस्थाको शेयर रकम ४७ लाख ७७ हजार ३ सय रुपैयाँ शेय रकम पुगेको छ । हाल २ सय ७० जना महिला र २ सय ९० जना पुरुष गरी ५ सय ६९ जना सदस्य रहेको संस्थाले जनाएको छ ।


साधारणसभामा विशेष अतिथि सुभाष ठाकुर, संजय महतो लगायत दर्जनौ व्यक्तिले शुभकामना मन्तव्य राख्नु भएको थियो । साधारणसभामा संस्थाको संचालक समिति, शेयरधनी, बचतकर्ता लगायत स्थानीयहरुको उपस्थिति रहेको थियो भने कार्यक्रमको संचालन संस्थाका रामनारायण लाल कर्णले गर्नुभएको थियो । यता साधारणसभा कार्यक्रममा संस्थाका सक्रिय सदस्य, जेष्ठ नागरिक, समाजसेवीहरुलाई गम्छा ओढाएर सम्मान गरिएको थियो ।

यसैबीच विवेकशिल साना किसान बहुउद्देश्य सहकारी संस्था लिमिटेड दिगम्वपुरको शनिवार सम्पन्न चौथो वार्षिक साधारणसभाले सात सदस्यीय नयाँ संचालक समिति चयन गरेको छ । सधारणसभाले संचालक समितिको अध्यक्षमा चाँदनी कुमारी, उपाध्यक्षमा जानकी कुमारी, सचिवमा रामकुमारी देवी, कोषाध्यक्षमा उषादेवी महतोलाई चयन गरेको छ । यस्तै संचालक समितिको सदस्यहरुमा ब्रहमदेव महतो, ममता कुमारी, बेचो कुमारी कोइरीलाई चयन गरेको संस्थाका प्रबन्धक रामकुमार महतोले जानकारी दिनुभयो ।