स्वागतम खबर
महेन्द्रनगर, कार्तिक ३० ।

‘सर्पको महत्व बुझौं, सहअस्तित्वलाई सम्मान गरौँ, संरक्षण मार्फत भविष्य सुरक्षित गरौँ’ भन्ने मूल नारासहित धनुषाको मिथिला बिहारी नगरपालिका–२ पुरन्दहामा आइतवारदेखि दुई दिवसीय नेपाल सर्प महोत्सव सुरु भएको छ । मिथिला वाइल्ड लाइफ ट्रष्ट र सेभ द लाइभ्सको संयुक्त आयोजनामा पुरन्दहाको कल्चर भिलेजमा सुरु भएको तेस्रो संस्करणको सर्प महोत्सव मंसिर १ गते (भोली) सम्म चल्नेछ । सर्प र मानवबीच द्वन्द्व न्यूनिकरण गर्दै यसको पर्यावरणीय, चिकित्सकीय, धार्मिक तथा सांस्कृतिक महत्व उजागर गर्ने मुख्य लक्ष्यसहित महोत्सव आयोजना गरिएको आयोजकले जनाएको छ ।
आयोजक संस्था मिथिला वाइल्ड लाइफ ट्रष्टका अध्यक्ष देवनारायण मण्डलको अनुसार सर्पको महत्वबारे नागरिकमा चेतना फैलाउने उद्देश्यले यो महोत्सव आयोजना गरिएको छ । अध्यक्ष मण्डलले महोत्सवमा सर्पको जीवनचक्र, विषका प्रकार, सर्पदंशपछिको उपचार प्रक्रिया र उद्धार सम्बन्धी व्यावहारिक जानकारी दिने व्यवस्था गरिएको बताउनुभयो । उहाँले सर्प संरक्षण सम्बन्धी वृत्तचित्र प्रदर्शनी र जीवित सर्प प्रदर्शनी मार्फत सहभागीहरूलाई प्रत्यक्ष दुई दिनसम्म अवलोकन र सिकाइको अवसर प्रदान गरिने छ ।


मानव–सर्पबीच सह–अस्तित्व प्रबद्र्धन, जैविक विविधता संरक्षण र पर्यावरणीय सन्तुलनमा सर्पको भूमिकामा केन्द्रित भएर महोत्सवमा विभिन्न सन्देश र चेतना मुलक सत्रसहित प्रदर्शन भईरहेको छ । सर्पको महत्व, संरक्षण, विषालु, अविषालु तथा सर्पले डसेमा गर्नुपर्ने उपाय र उपचार विधि विषयमा विभिन्न विद्यालयका विद्यार्थीहरुद्धारा तयार पारिएको विभिन्न प्रजातिका डेमो सर्प सहित स्टल राखेर प्रदर्शन गरिएको छ भने महोत्सवमा आउने दर्शक र सर्वसाधारणहरुलाई विद्यार्थीहरुले सम्झाउने बुझाउने कार्य समेत गर्ने गरेका छन् ।
अझै पनि सर्पलाई हेर्ने वित्तिकै मान्छे डराउने, सर्पलाई मार्ने चलन हाम्रो गाउँ समाजमा रहेकोले यो सोच बदल्नु पर्ने र सर्प पर्यावरणका लागि आवश्यक रहेकाले यसको सरंक्षण गर्नुपर्ने भन्दै स्टलमा रहेका विद्यार्थीहरुले दर्शकलाई सम्झाउने बुझाउने गरेका छन् ।
महोत्सवमा हेर्न आउनेहरुमा विद्यार्थी, शिक्षक, अभिभावक, पर्यावरण, वातावरण अभियन्ताहरुको उल्लेख्य सहभागिता देखिएको छ ।

महोत्सवमा देखिएको दृश्य